काठमाडौँ । अर्थमन्त्री डा. स्वर्णिम वाग्लेले सरकारले आर्थिक वर्ष २०८३/८४ का लागि प्रस्तुत गरेको बजेट पछिल्लो १२ वर्षयताकै सबैभन्दा अनुशासित र तुलनात्मक रूपमा सानो आकारको रहेको दाबी गरेका छन्।
सोमबार राष्ट्रिय सभामा विनियोजन विधेयक, २०८३ माथिको छलफलका क्रममा उठेका प्रश्नहरूको जवाफ दिँदै उनले बजेटको आकार अनुमानित अर्थतन्त्रको कुल आकारको २८.५ प्रतिशतमा सीमित रहेको उल्लेख गरे। यही आधारमा यसलाई पछिल्लो १२ वर्षकै सबैभन्दा अनुशासित बजेटका रूपमा व्याख्या गर्न सकिने उनको भनाइ थियो।
अर्थमन्त्री वाग्लेले बजेट कार्यान्वयनबारे अनावश्यक शंका नगर्न आग्रह गर्दै त्यसलाई प्रभावकारी बनाउन अर्थ मन्त्रालयमा केन्द्रित रहेका विभिन्न अधिकार सम्बन्धित मन्त्रालयमा हस्तान्तरण गरिएको जानकारी दिए। उनका अनुसार मन्त्रालय-मन्त्रालयबीच फाइल घुमाएर स्वीकृति लिनुपर्ने पुरानो अभ्यास हटाइएको छ भने रकमान्तरलगायतका अधिकारसमेत सम्बन्धित मन्त्रालयलाई प्रदान गरिएको छ।
उनले शिक्षा, स्वास्थ्य तथा विद्युत् क्षेत्रमा प्रस्ताव गरिएका करका व्यवस्था तत्कालीन आवश्यकताभन्दा दीर्घकालीन सार्वजनिक हितलाई ध्यानमा राखेर तय गरिएको स्पष्ट पारे। सरकारको आर्थिक विकाससम्बन्धी लक्ष्य हासिल गर्ने उद्देश्यलाई केन्द्रमा राखेर बजेट तर्जुमा गरिएको उनको भनाइ थियो।
यसैबीच, प्रतिनिधि सभाबाट सन्देशसहित राष्ट्रियसभामा पुगेको विनियोजन विधेयक, २०८३ माथि विचार गरियोस् भन्ने प्रस्ताव राष्ट्रिय सभाले सर्वसम्मत रूपमा स्वीकृत गरेको छ। राष्ट्रियसभाको अर्को बैठक असार १७ गते बस्ने तय भएको छ।
