काठमाडौँ। आज मध्यान्हपछि देशका विभिन्न स्थानमा वर्षा र हिमपातको सम्भावना रहेको छ। मौसम पूर्वानुमान महाशाखाका अनुसार कर्णाली र सुदूरपश्चिम प्रदेशका धेरै स्थानमा तथा गण्डकी, लुम्बिनी र कोशी प्रदेशका पहाडी तथा हिमाली भूभागका केही क्षेत्रमा मेघगर्जन,चट्याङ र असिनासहित मध्यम वर्षा तथा हिमपात हुनसक्ने अनुमान गरिएको छ।
विशेषगरी कर्णाली र सुदूरपश्चिम प्रदेशका पहाडी तथा हिमाली भूभागका एक/दुई स्थानमा भारी वर्षा वा हिमपातको सम्भावना रहेको महाशाखाले जनाएको छ। हाल देशमा पश्चिमी न्यून चापीय प्रणालीसँगै स्थानीय वायुको प्रभाव सक्रिय रहेको छ।
महाशाखाका अनुसार आज दिउँसो र राति देशका अधिकांश स्थानमा बदली रहनेछ। कर्णाली, सुदूरपश्चिम र गण्डकी प्रदेशका धेरै स्थानमा तथा अन्य प्रदेशका केही क्षेत्रमा मेघगर्जनसहित वर्षा र हिमपातको सम्भावना रहेकोले आवश्यक सतर्कता अपनाउन आग्रह गरिएको छ।
