काठमाडौं । नेपाली बजारमा सुनको मूल्यमा यस साता उल्लेखनीय गिरावट देखिएको छ। नेपाल सुनचाँदी व्यवसायी महासंघका अनुसार, फागुन २९ गते शुक्रवार प्रतितोला ३ लाख १४ हजार २०० रुपैयाँमा कारोबार भएको सुनको मूल्य क्रमशः घट्दै चैत ६ गते शुक्रवारसम्म आइपुग्दा २ लाख ९४ हजार ५०० रुपैयाँमा झरेको छ।
जस अनुसार, एक सातामै सुनको मूल्यमा कुल १९ हजार ७०० रुपैयाँको भारी गिरावट आएको छ, जुन पछिल्ला समयको उल्लेखनीय मूल्य सुधारमध्ये एक हो।
साताभरको मूल्य प्रवृत्ति विश्लेषण गर्दा सुरुवाती दिनहरूमा सामान्य उतारचढाव देखिए पनि पछिल्ला दिनहरूमा तीव्र गिरावट आएको स्पष्ट हुन्छ।
तर, चैत ४ गते बुधबारदेखि बजारमा गिरावटको स्पष्ट संकेत देखियो, जहाँ सुनको मूल्य एकैदिन २ हजार २०० रुपैयाँले घटेर ३ लाख ७ हजार ७०० रुपैयाँमा झरेको थियो। त्यसपछिका दिनहरूमा गिरावट अझ तीव्र बन्दै गएसँगै चैत ५ गते बिहीबार ५ हजार ४०० रुपैयाँले घट्दै ३ लाख २ हजार ३०० रुपैयाँमा आइपुग्यो भने चैत ६ गते शुक्रवार पुनः ७ हजार ८०० रुपैयाँले घटेर २ लाख ९४ हजार ५०० रुपैयाँमा सीमित भएको हो ।
व्यवसायीहरूका अनुसार अन्तर्राष्ट्रिय बजारमा देखिएको मूल्य समायोजन तथा माग–आपूर्तिको सन्तुलन परिवर्तन यसको प्रमुख कारण भएको बताएका छन् ।
