काठमाडौं । नेपाल राष्ट्र बैंकले डेबिट कार्डबाट रकम झिक्न पाउने सीमा घटाएको छ । केन्द्रीय बैंकले आज (शुक्रबार) भुक्तानी प्रणालीसम्बन्धी एकीकृत निर्देशन, २०८१ संशोधन गर्दै डेबिट कार्डबाट रकम झिक्न पाउने सीमा घटाएको हो ।
राष्ट्र बैंकले बैंक तथा वित्तीय संस्थाहरुबाट जारी डेबिट कार्डबाट प्रतिकारोबार २० हजार रुपैयाँ, प्रतिदिन रकम ५० हजार रुपैयाँ र प्रतिमहिना ३ लाख रुपैयाँसम्म रकम झिक्न पाइने व्यवस्था गरेको छ । यसअघिको व्यवस्थाअनुसार डेबिट कार्डबाट प्रतिकारोबार २५ हजार रुपैयाँ, प्रतिदिन रकम १ लाख रुपैयाँ र प्रतिमहिना ४ लाख रुपैयाँसम्म रकम झिक्न पाइने व्यवस्था थियो ।
राष्ट्र बैंकले प्रिपेड कार्ड र क्रेडिट कार्डको कारोबार रकम सीमा भने यथावत नै राखेको हो । जसअनुसार प्रिपेड कार्डबाट प्रतिकारोबार १० हजार रुपैयाँ, प्रतिदिन रकम २० हजार रुपैयाँ प्रतिमहिना २ लाख रुपैयाँ झिक्न पाइने छ । क्रेडिट कार्डबाट भने स्वीकृत सीमाको १० प्रतिशतसम्म कारोबार गर्न पाइने राष्ट्र बैंकले जनाएको छ ।
