काठमाडौं । सरकारी स्वामित्वको नेपाल बैंक लिमिटेडले चालु आर्थिक वर्ष २०८२/८३ को पहिलो त्रैमाससम्मको अपरिष्कृत वित्तीय विवरण सार्वजनिक गरेको छ । विवरण अनुसार, बैंकले तीन महिनाको अवधिमा ५८ करोड ८२ लाख रुपैयाँ खुद नाफा आर्जन गरेको छ, जुन अघिल्लो वर्षको सोही अवधिको तुलनामा २.३१ प्रतिशतले घटेको हो ।
गत आर्थिक वर्षको पहिलो त्रैमाससम्ममा बैंकले ६० करोड २१ लाख रुपैयाँ नाफा कमाएको थियो।
समीक्षा अवधिसम्ममा बैंकको वितरणयोग्य मुनाफा ऋणात्मक (–५७ करोड १ लाख रुपैयाँ) रहेको छ, जसले आगामी अवधिमा लाभांश वितरणमा चुनौती देखाएको छ । नाफा घटेसँगै बैंकको प्रतिशेयर आम्दानी (EPS) पनि घटेको छ । चालु वर्षको पहिलो त्रैमाससम्म EPS ३८ पैसा घटेर १६ रुपैयाँ १ पैसामा पुगेको छ ।
असोज मसान्तसम्ममा बैंकको प्रतिशेयर नेटवर्थ २६० रुपैयाँ ३२ पैसा रहेको छ भने मूल्य–आम्दानी अनुपात (P/E ratio) १५.०५ गुणा कायम रहेको छ । नेपाल बैंकको चुक्ता पूँजी १४ अर्ब ६९ करोड रुपैयाँ रहेको छ भने जगेडा कोषमा २३ अर्ब ५५ करोड रुपैयाँ सञ्चित छ । बैंकले असोज मसान्तसम्ममा ३ खर्ब ४० अर्ब रुपैयाँ निक्षेप संकलन गरी २ खर्ब २३ अर्ब रुपैयाँ कर्जा प्रवाह गरेको विवरणमा उल्लेख गरिएको छ ।
समग्रमा हेर्दा, नेपाल बैंकले ब्याज आम्दानीमा उल्लेख्य सुधार गरेपनि वितरणयोग्य नाफा ऋणात्मक हुनु र फि–कमिशन आम्दानी घट्नुले बैंकको आम्दानी संरचना सन्तुलनमा चुनौती देखिएको छ ।
