काठमाडौँ । नेपाली बीमा क्षेत्रको कुशल बीमा प्रशासक के बी (कृष्ण बहादुर) बस्नेतको ८४औं वर्षको उमेरमा निधन भएको छ ।
बस्नेतको आज बिहान ११ः३० बजे निधन भएको छ । केही समयदेखि पेट सम्बन्धी रोगले बिरामी परेका बस्नेतको आज बिहान निधन भएको पारिवारिक स्रोतले जानकारी दिएको छ। बस्नेतको अहिले पशुपति आर्यघाटमा अन्तिम संस्कार भइरहेको समेत परिवारले जानकारी दिएको छ ।
नेपाली बीमा जगतमा आईडल व्यक्तित्वको रूपमा लिइने बस्नेतको मृत्युले धेरैलाई स्तब्ध बनाएको छ । जीवनको लामो उमेर बीमा क्षेत्रको विकासको लागि खर्चिएका बस्नेतले नेपालमा बीमा कम्पनीको अभावमा भारतीय कम्पनी दि ओरियन्टल कम्पनीको शाखा भित्राउन महत्त्वपूर्ण भूमिका निर्वाह गरेका थिए ।
सगरमाथा इन्स्योरेन्स कम्पनीको सिईओबाट अवकाश लिएर रिटायर्ड लाइफ बाचिरहेका बस्नेतको ८४औं वर्षको उमेरमा निधन भएको छ । बस्नेतले सिद्धार्थ इन्स्योरेन्स कम्पनी स्थापनामा महत्त्वपूर्ण भूमिका निर्वाह गरेका थिए।
त्यस्तै, युनाइटेड इन्स्योरेन्स कम्पनी र सगरमाथा इन्स्योरेन्स कम्पनीलाई अब्बल बनाउन उनको ऐतिहासिक भूमिका रहेको मानिन्छ । स्वर्गीय बस्नेतका दुई छोरा र एक छोरी रहेका छन् ।
