काठमाडौं । बैंक तथा वित्तीय संस्थाहरुले सुनचाँदी धितो कर्जामा उल्लेख्य वृद्धि गरेका छन्। नेपाल राष्ट्र बैंकका अनुसार चालु आर्थिक वर्षको पहिलो तीन महिनामा यस्तो कर्जा ४२.३१ प्रतिशतले बढेको छ।
केन्द्रीय बैंकका तथ्यांकअनुसार, चालु आर्थिक वर्षको असोज मसान्तसम्म बैंक तथा वित्तीय संस्थाहरुले सुनचाँदी धितो राखेर ८६ अर्ब ४० करोड ३० लाख रुपैयाँ कर्जा प्रवाह गरेका छन्।
त्यसैगरी, वाणिज्य बैंकहरुले मात्र चालु आर्थिक वर्षको तीन महिनामा ८० अर्ब ७ करोड ४० लाख रुपैयाँको सुन–चाँदी धितो कर्जा प्रवाह गरेका छन्। यो रकम गत आवको सोही अवधिको तुलनामा ४४ प्रतिशतले बढेको हो। वाणिज्य बैंकमध्ये सबैभन्दा बढी सुनचाँदी कर्जा प्रवाह गर्ने बैंक नेपाल बैंक रहेको छ। उक्त बैंकले यस अवधिमा ३८ अर्ब २१ करोड ७० लाख रुपैयाँ कर्जा प्रवाह गरेको छ, जुन गत आवको सोही अवधिको तुलनामा ६०.३५ प्रतिशत (१४ अर्ब ३८ करोड ३० लाख रुपैयाँ) बढी हो।
त्यस्तै, राष्ट्रिय वाणिज्य बैंकको सुनचाँदी धितो कर्जा ३४.७३ प्रतिशत (७ अर्ब २३ करोड १० लाख रुपैयाँ) ले बढेको छ। यस बैंकले चालु आवमा २८ अर्ब रुपैयाँ बराबरको कर्जा लगानी गरेको छ। अन्य बैंकहरुमा प्राइम कमर्सियल बैंकले ७ अर्ब २७ करोड ७० लाख, नेपाल इन्भेष्टमेन्ट मेगा बैंकले २ अर्ब ६७ करोड ४० लाख, र नविल बैंकले २ अर्ब १० करोड २० लाख रुपैयाँ सुन–चाँदी धितो कर्जा प्रवाह गरेका छन्।
गत आवको सुरुको तीन महिनाको तुलनामा चार वाणिज्य बैंकको सुन–चाँदी कर्जा घटेको छ भने १० बैंकको बढेको छ। कर्जा घट्ने बैंकहरुमा कृषि विकास बैंक (८१.२५%), प्रभु बैंक (९३.४२%), एनआइसी एसिया बैंक (५०%), र एनएमबि बैंक (७१.०१%) समावेश छन्।
