बैंकहरूले निर्माण क्षेत्रमा बढाए कर्जा लगानी, कुन बैंकको कति ?

Aarthik voice

१ वर्ष अगाडि|२० भदौ २०८२, शुक्रबार

544Shares

बैंकहरूले निर्माण क्षेत्रमा बढाए कर्जा लगानी, कुन बैंकको कति ?

काठमाडौं । लामो समयदेखि आर्थिक मन्दीको चपेटामा अड्किएको निर्माण क्षेत्र अब पुनः गति लिन थालेको छ। अर्थतन्त्रका सूचकहरूमा देखिएको सुधारसँगै जलविद्युत्, सडक,पुलदेखि भवन निर्माणसम्म ठप्पजस्तै बनेको उद्योग फेरि चलायमान बनेको हो।

निजी क्षेत्रको चर्को सक्रियता,सरकारी सहुलियत र कानुनी सुधारले लगानी प्रवाहलाई हौसला दिएको छ। बैंकिङ प्रणालीबाट ऋण सहज भएपछि ठूला–ठूला आयोजनामा पूँजी बढेको छ।

नेपाल राष्ट्र बैंकका तथ्याङ्कअनुसार,गत आर्थिक वर्ष २०८१/८२ मा मात्र २० वाणिज्य बैंकहरूले निर्माण क्षेत्रमा २ खर्ब ४ अर्ब ८८ करोड रुपैयाँ कर्जा प्रवाह गरेका छन् । यो अघिल्लो वर्षको तुलनामा ११.५ प्रतिशत बढी हो । केवल एक वर्षमै २१ अर्ब १४ करोड ८५ लाख रुपैयाँ थप कर्जा प्रवाह भएको छ ।

लगानीमा सबैभन्दा अगाडि नबिल बैंक रहेको छ (२४ अर्ब ८२ करोड ९० लाख रुपैयाँ) त्यसपछि एनआईसी एशिया (२२ अर्ब ४ करोड), लक्ष्मी सनराइज १९ अर्ब ८६ करोड, कुमारी बैंक १५ अर्ब ८७ करोड, सिटिजन्स १५ अर्ब ४९ करोड र प्रभु बैंक १३ अर्ब ९८ करोडसँगै अन्य बैंकहरूले पनि उल्लेख्य लगानी बढाएका छन् ।

यद्यपि चार बैंकको कर्जा प्रवाह घटेको छ, समग्रमा भने निर्माण क्षेत्रमा आएको सक्रियता निर्णायक बनेको छ। यो चहलपहलले रोजगारी सिर्जना, आन्तरिक माग विस्तार र बैंकिङ कारोबारमा तातोपन थपेको छ-जसलाई अर्थतन्त्र पुनर्जीवनतर्फ मोडिएको बलियो संकेत मानिन्छ।