भिजिट भिसा प्रकरण : प्रारम्भ हुन नपाउँदै अवरोध भएपछि प्रतिनिधिसभा बैठक स्थगित

काठमाडौँ  । भिजिट भिसा प्रकरणमा गृहमन्त्रीको राजीनामाको विषयलाई लिएर विपक्षी दलहरूले अवरोध गरेपछि प्रतिनिधिसभा बैठक आज पनि स्थगित भएको छ।

सभामुख देवराज घिमिरेले बैठक प्रारम्भ भएको घोषणा गर्नासाथ विपक्षी दलहरूले उठेर अवरोध सुरू गरेका थिए। गृहमन्त्रीको राजीनामा दिनुपर्ने अडानबाट पछि नहटेपछि अवरोधकै बिच संसद् सञ्चालन गर्न नसकिने भन्दै सभामुखले भोलि दिउँसो ३ बजेसम्मका लागि संसद् स्थगित गरेको घोषणा गरे।

प्रतिनिधिसभाको आजको सम्पूर्ण कार्यक्रम सूचीबाट हटाएको जानकारी गराउँदै सभामुखले बैठक स्थगित भएको घोषणा गरेका हुन्।