काठमाडौं – नेपाल राष्ट्र बैंकका गभर्नर विश्व पौडेलले बजारमा राष्ट्र बैंकको नियन्त्रण र हस्तक्षेप नहुने हो भने निक्षेपको ब्याजदर १ प्रतिशतसम्म झर्न सक्ने बताएका छन्। शुक्रबार बैंक तथा वित्तीय संस्था परिसंघको वार्षिक साधारणसभामा बोल्दै उनले हाल निक्षेपको ब्याजदर २.७५ प्रतिशतभन्दा कम नभएको राष्ट्र बैंकको नीतिगत व्यवस्थाका कारण भएको दाबी गरे।
गभर्नर पौडेलले तरलता व्यवस्थापनमा राष्ट्र बैंकको भूमिका महत्वपुर्ण रहेको बताएका छन्। उनले बैंक तथा वित्तीय संस्थाहरूलाई स्थायी तरलता सुविधा मार्फत ठूलो मात्रामा तरलता उपलब्ध गराइएको जानकारी दिए।
तरलता समस्यालाई दीर्घकालीन रूपमा समाधान गर्न ऋण लगानी हुने वातावरण निर्माण गर्नुपर्नेमा गभर्नर पौडेलले जोड दिए। यसका लागि राष्ट्र बैंकले केही नीतिगत विषयमा अध्ययन गरिरहेको समेत उनले जानकारी दिए। अन्त्यमा, उनले बैंकिङ क्षेत्रमा लागू भइरहेको कालोसूची (Blacklisting) र कर्जा नोक्सानी (Loan Loss Provision) सम्बन्धी नियमहरूको पुनरावलोकन हुने संकेत गरे।
