काठमाडौँ । प्राइम कमर्सियल बैंक लिमिटेडको चालु आर्थिक वर्ष २०८२/८३ को पहिलो त्रैमासिक वित्तीय विवरण सार्वजनिक भएको छ। विवरण अनुसार, बैंकको खुद नाफा २.२० प्रतिशतले घटेर गत आवको असोज मसान्तसम्मको तुलनामा केही कम भएको छ।
गत आवको पहिलो त्रैमासमा बैंकले १ अर्ब २८ करोड ६७ लाख रुपैयाँ नाफा कमाएको थियो भने चालु आवको सोही अवधिमा यो घटेर १ अर्ब २५ करोड ८४ लाख रुपैयाँमा पुगेको हो।
नाफामा सामान्य कमी आए पनि बैंकको सञ्चालन नाफा र ब्याज आम्दानीमा सुधार देखिएको छ। सञ्चालन नाफा गत आवको १ अर्ब ८२ करोड ८३ लाख रुपैयाँबाट १३.५४ प्रतिशतले वृद्धि भई २ अर्ब ७ करोड ५८ लाख रुपैयाँ पुगेको छ। त्यस्तै, खुद ब्याज आम्दानी पनि २ अर्ब ३३ करोड १८ लाख रुपैयाँबाट बढेर २ अर्ब ४० करोड ७४ लाख रुपैयाँमा पुगेको छ।
समीक्षा अवधिमा बैंकको खराब कर्जा अनुपात (NPL) गत वर्षको ४.८६ प्रतिशतबाट बढेर ५.८६ प्रतिशतमा पुगेको छ भने प्रतिसेयर आम्दानी (EPS) २६.५३ रुपैयाँबाट घटेर २५.९४ रुपैयाँमा झरेको छ। बैंकको चुक्ता पूँजी १९ अर्ब ४० करोड २५ लाख रुपैयाँ रहेको छ। सोही अवधिमा बैंकको जगेडा कोषमा ३ अर्ब ४ करोड ४६ लाख रुपैयाँ र रिजर्भ कोषमा १२ अर्ब ३४ करोड ५७ लाख रुपैयाँ सञ्चिति भएको छ।
बैंकले हालसम्म २ खर्ब १४ अर्ब ९५ करोड रुपैयाँ कर्जा प्रवाह गरेको छ भने २ खर्ब ६१ अर्ब ७५ करोड रुपैयाँ निक्षेप संकलन गरेको छ। बैंकले कर्जा प्रवाह र निक्षेप संकलन दुबैमा सन्तुलन कायम गर्न सफल भएको बताएको छ। बैंकका अनुसार, ब्याज आम्दानीमा देखिएको सुधारले आगामी त्रैमासिकमा नाफा वृद्धिको सम्भावना बलियो बनाएको छ।
