काठमाडौँ। केही दिनयता सामान्य घटबढ हुँदै आएको नेपाली सुनचाँदी बजारमा सोमबार एकाएक ठूलो वृद्धि देखिएको छ। आज सुनको मूल्य एकैदिन ४ हजार ६ सय रुपैयाँले बढ्दै प्रतितोला २ लाख ६५ हजार रुपैयाँ पुगेको छ।
यसअघि आइतबार स्थानीय बजारमा सुनको कारोबार प्रतितोला २ लाख ६० हजार ४ सय रुपैयाँमा भएको थियो। अघिल्लो दिन भने सुनको भाउ २ हजार १ सय रुपैयाँले घटेको थियो, तर सोमबार पुनः तीव्र उकालो लागेको हो।
लगातारको उतारचढावपछि आज सुनको मूल्य उच्च विन्दुमा पुगेसँगै उपभोक्तामाथि थप आर्थिक भार परेको छ। सुनसँगै चाँदीको मूल्यमा पनि वृद्धि देखिएको छ। आज चाँदीको भाउ १८५ रुपैयाँले बढेर प्रतितोला ४ हजार ६ सय ८५ रुपैयाँ कायम भएको छ। अघिल्लो दिनको तुलनामा चाँदी पनि महँगिएको हो।
अन्तर्राष्ट्रिय बजारमा सुनको मूल्यमा आएको उतारचढाव, अमेरिकी डलरको अवस्था, भूराजनीतिक तनाव तथा माग–आपूर्तिको सन्तुलनले स्थानीय बजारमा पनि यसको प्रभाव देखिने गरेको व्यवसायीहरू बताउँछन्।
