काठमाडौं। प्रतिकुल अवस्थामा पनि सिटिजन्स बैंक इन्टरनेशनल लिमिटेडले सन्तोषजनक प्रगती गरेको छ । बैंकले गत आर्थिक वर्षको वित्तीय रिपोर्ट सार्वजनिक गर्दै १ अर्ब ३४ करोड २४ लाख रुपैयाँ नाफा कमाएको जनाएको छ ।
यो अघिल्लो वर्षको भन्दा २७ प्रतिशत कम हो । देशमा आर्थिक मन्दी, खराब कर्जाको वृद्धि दर, बढी ब्याजदरका कारण कर्जाको माग घट्नु र राष्ट्र बैंकको कसिलो नीतिका कारणले गर्दा धेरै बैंकहरुको नाफामा असर परेको छ ।
यसैको कारण सिटिजन्सको पनि मुनाफा केही घटेको हो । तर, तुलनात्मक रुपमा यो गिरावट खासै ठूलो देखिंदैन । केही बैंकहरुको नाफा ५० प्रतिशतसम्म घटेको छ ।
पछिल्ला वर्षहरुमा निकै राम्रो व्यापार विस्तार गर्दै अघि बढेको सिटिजन्सले हरेक वर्ष लगानीकर्तालाई लाभांश दिंदै आएको छ । त्यसैले बैंकले यस वर्ष पनि सेयरधनीको हात खाली नगर्ने सम्भावना छ । कम्पनीको लाभांश क्षमता ६१ करोड ६१ लाख रुपैयाँ देखिएको छ । यता, अधिकांश बैंकहरुको लाभांश दिनसक्ने क्षमता निकै कम छ । जसमध्ये ४ वटा बैंकको उक्त क्षमता ऋणात्मक छ । त्यसमध्ये यसले उक्त क्षमता घनात्मक हुने निकै राम्रो मान्न सकिन्छ ।
कर्जा परिचालन तथा निक्षेप संकलनमा बैंकले राम्रो प्रगती गरेको छ । यसको निक्षेप संकलन १ खर्ब ८९ अर्ब भन्दा धेरै छ । त्यसैगरी, कर्जा परिचालन पनि १ खर्ब ५३ अर्ब रुपैयाँ भन्दा धेरै नै छ । यसको अर्थ बैंकले व्यापारमा सुधार देखिएको छ । २०७६-७७ मा यो बैंकले कुल ९२ अर्ब १८ करोड रुपैयाँ निक्षेप संकलन गरेको थियो । ४ वर्षमा निक्षेप संलन ९७ अर्ब ३ करोड रुपैयाँले बढेको छ । त्यसैगरी, कर्जा परिचालन पनि ७२ अर्ब ४ करोड रुपैयाँले बढेको छ ।
छोटो समयमा बैंकको निक्षेप संकलन र कर्जा परिचालन क्रमशः १०५ प्रतिशत र ८८ प्रतिशत पुगेको छ । यो निकै आक्राम व्यापार विस्तार हो । बैकले शाखा विस्तार गरेर सर्वसाधारणलाई धेरै सहज सेवा उपलब्ध गराएको छ । यता, बैंकले पछिल्लो ४ वर्षमा ५६ प्रतिशतले चुक्ता पुँजी वृद्धि गरेको छ । २०७६-७७ मा ९ अर्ब ८ करोड ९८ लाख रहेको पुँजी अहिले बढेर १४ अर्ब २० करोड पुगेको हो ।
गत आर्थिक वर्षमा बैंकले बाग्मती प्रदेशमा ४, गण्डकी प्रदेशमा २, कर्णाली प्रदेश १ र सुदूरपश्चिम प्रदेशमा २ गरी ९ वटा थप शाखाहरु संचालनमा ल्याएको छ । बैंकका अनुसार हालसम्म यसको शाखा कार्यालय संख्या १९७, एटीएम १६२, एक्सटेन्सन काउन्टर ३ वटा र ९७ वटा शाखा रहित बैंकिङ सेवा उपलब्ध गराउदै आएको छ ।
यता, बेस रेट जम्मा ८.२६ प्रतिशत देखिएको छ । एनपीएल ४.०७ प्रतिशत छ । सीडी रेसियो ८१.८४ प्रतिशत छ । यसको अर्थ बैंकसँग थुप्रै लगानीयोग्य रकम रहेको बुझ्न सकिन्छ । बैंकले सार्वजनिक गरेको रिपोर्ट अनुसार यसको प्रतिसेयर आम्दानी ९.४५ रुपैयाँ रहेको छ । भने, नेटवर्थ १५१.८१ रुपैयाँ छ । यसको आरओई ६.२६ प्रतिशत छ ।
