काठमाडौँ। निषेधित घेरा बारलाई तोडेर सङ्घीय संसद् भवनमा प्रवेश गरेका लघुवित्तका ऋणीहरूलाई प्रहरीले मुद्दा चलाउने भएको छ ।
बानेश्वरस्थित संसद् भवनबाट फागुन १४ मा ४८ जना महिला र एक जना पुरुषलाई निषेधित क्षेत्र तोडेको आरोपमा पक्राउ गरेर अनुसन्धान गरिरहेको छ ।
साथै उक्त घटनाबारे छानबिन गर्न प्रहरी वरिष्ठ उपरीक्षक दिनेशराज मैनालीको नेतृत्वमा समिति गठन समेत गरिएको छ । समितिमा जिल्ला प्रहरी परिसर काठमाडौँका एसपी नवराज अधिकारी र उपत्यका प्रहरी कार्यालयका डीएसपी दिनेश घिमिरे सदस्य छन् ।
पक्राउ गरिएका लघुवित्तका ऋणीहरूलाई मुद्दा चलाइने काठमाडौँका प्रहरी स्रोतको भनाई छ । प्रहरीले दिएको जानकारी अनुसार अराजक गतिविधिमा संलग्नहरुविरुद्ध मुद्दा चल्ने र अहिले छनोट गर्ने काम भइरहेको छ।’
संवेदनशील क्षेत्रमा प्रवेश गर्न उक्साउने र अराजक गतिविधि गर्नेहरूलाई पहिचान गरेर पक्राउ परेकामध्ये केहीलाई मात्र छाड्ने प्रहरीको तयारी छ । उनीहरुविरुद्ध प्रहरी वृत्त नयाँ बानेश्वरले मुलुकी अपराध संहिता–२०७४ अनुसार सार्वजनिक शान्तिविरुद्धको कसुरमा म्याद लिने भएको छ ।
