काठमाडौं । दाङको घोराही उपमहानगरपालिका–१३ तुरुन्तपुरका ६० वर्षीय दीपकुमार मगरले व्यावसायिक रूपमा मौरीपालन गरेर नै जीविका चलाउन थालेको २४ वर्ष भइसक्यो । उनले एक याममा मात्रै १२ लाखको मह बेच्ने गरेका छन् ।
मगरको मौरी फार्ममा मौरी सहितका ८६ घार रहेका छन् । उनले वर्षमा ३५ क्विन्टल मह उत्पादन गर्दै आएका छन् । फार्ममा युरोपिय, इटालियन, मेरीफेरा, सेरेना जातका मौरीका घार रहेको उनको भनाई छ ।
दुई–तीन वर्ष वैदेशिक रोजगारीमा रहँदा उनले त्यहाँ मौरीपालन गरेको देखेर स्वदेश फर्केर त्यही व्यावसाय थालेको बताए । उनले २०५७ सालमा मौरीपालन थाल्दा जिल्लामा १७ जना व्यावसायिक रुपमा मौरी पाल्ने किसान थिए । व्यावसायिक रूपमा मौरीपालन थालेदेखि हालसम्म आम्दानीका लागि अन्य कुनै पनि स्रोत खोज्न नपरेको उनको अनुभव छ ।
साथै उनले मौरीपालनका निम्ति आवश्यक पर्ने घार लगायत सामग्री पनि बनाउने गरेका छन्। ती सामान रोल्पा, सल्ल्यान, प्यूठानलगायत जिल्लाका मौरीपालक किसानले खरिद गर्दै आएका उनको भनाई छ ।
