काठमाडौँ । लगातार ५ दिन तिहारको बिदा पश्चात् आज खुलेको शेयर बजारमा झिनो अंकले घटेको छ। शेयर बजार बढ्ने अपेक्षा बोकेर बसेको लगानीकर्तालाई बजारले निराश बनाएको छ ।
यस दिन नेप्से सूचक ०.२१ विन्दुले घटेर २६७७.४० अंकमा अडिएको छ। बजारमा गिरावट आउँदा ४ अर्ब २० करोड रुपैयाँभन्दा बढीको सेयर कारोबार भएको छ। २ कम्पनी सकारात्मक सर्किट लेबलमा कारोबार भएका छन् । १३ मध्ये ७ समूहका सूचक सकारात्मक बनेका छन् ।
पछिल्ला केही समययता बजार समग्रमा सुस्त नै देखिएको छ । बजार २६ सयको लाइनमा घुमिरहेको छ । समग्रमा हेर्दा यो तहमा आएर नेप्से साइडवेज बसेको देखिन्छ । २६ सयभन्दा तल पनि आउन सकेको छैन ।
बजारले माथि तिरकै रेखाहरू कोर्न खोजे पनि पछिल्ला केही समययता भने नेप्सेको गति निकै सुस्त देखिएको छ । कारोबार रकम पनि औसतमा न्यून छ । बैंकिङ प्रणालीमा रहेको अधिक तरलता र सस्तो ब्याजदरले बजारलाई माथि तिरै लैजान खोजिरहेको देखिन्छ । यसकै लागि बजारले अहिले तयारी गरिरहेको कतिपयको बुझाई छ ।
यसअघि नेप्से बढेर करिब ३ हजारको तहसम्म पुगेको थियो । त्यसबाट करेक्सन हुँदै २४ सयकै लाइनमा झर्यो । बजार उक्त विन्दुबाट पुनः माथितिर लागेर अहिले २६ सयको तहमा आएको हो । बैंक, वित्तीय संस्थाहरूले प्रथम त्रैमासको वित्तीय विवरण सार्वजनिक गरिसकेका छन्। बिमा लगायत समूहका कम्पनीहरूको विवरण भने आउन बाँकी छ ।
आज ७ उपसूचकमा हरियाली लागेको छ। फाइनान्स समूहको ०.२० प्रतिशत, होटल तथा पर्यटन समूहको ०.८२ प्रतिशत, हाइड्रोपावर समूहको ०.७७ प्रतिशत र जीवन बीमा समूहको ०.३९ प्रतिशतले शेयर मूल्य बढेको छ । आज ११३ कम्पनीको शेयर मूल्य बढेको छ भने १२४ कम्पनीको घटेको छ ।
लाभांशको सिजन पनि चलेको छ । सूचीकृत कम्पनीहरूले धमाधम लाभांश घोषणा गरिरहेका छन् । लगानीकर्ताले सकेसम्म सबल वित्तीय सूचक भएका, लाभांश क्षमता राम्रो रहेका कम्पनीहरूमा जोखिम बहन क्षमतालाई समेत मध्यनजर गर्दै लगानी गर्न सके लाभ लिन सक्ने सम्भावना कायम रहन्छ
