एजेन्सी । एप्पलले आफ्नो नयाँ आईफोनमा लाइटनिङ चार्जिङ पोर्टको सट्टा सी–टाइप चार्जिङ पोर्ट भएको पुष्टि गरेको छ । युरोपेली सङ्घको दबाबमा कम्पनीले यो कदम चालेको हो ।
अहिलेसम्म, आईफोनमा अन्य फोनभन्दा छुट्टै लाइट चार्जिङ पोर्ट थियो, जुन आईफोनको पहिचान पनि थियो । तर अब एप्पलले यसलाई परिवर्तन गर्ने निर्णय गरेको छ ।
मङ्गलवार आफ्नो वार्षिक लन्च कार्यक्रममा, कम्पनीले अब ‘विश्वव्यापी रूपमा स्वीकृत मानक’ युएसबी–सी केबल नै प्रयोग गरिने बताएको छ ।
मङ्गलवार एप्पलले आफ्नो नयाँ सिरिजको घडी पनि सार्वजनिक गरेको छ । यसमा पहिले भन्दा धेरै उन्नत चिप हुनेछ ।
यद्यपि, विश्लेषकहरू विश्वास गर्छन् कि एप्पलले यो वर्ष ल्याएको अपडेट धेरै उल्लेखनीय छैन र यसले धेरै मानिसहरूलाई निराश पार्नेछ ।
सीसीएस इनसाइटसँग सम्बद्ध बेन वुड भन्छन्, ‘आइफोन र एप्पल वाच अब परिपक्व उत्पादनहरू भइसकेका छन्, त्यसैले यो अचम्मित पार्ने खालको पनि छैन ।’
‘यसले आईफोन र वाच उत्पादनहरू कत्तिको उत्कृष्ट छन् र हरेक वर्ष सनसनीपूर्ण अपडेट प्रदान गर्न कत्ति गाह्रो छ भनेर देखाउँदछ,’ वुड भन्छन् ।
नयाँ आईफोन अर्को सातादेखि बजारमा उपलब्ध हुनेछ । यो सन् २०१२ पछि पहिलो आईफोन हुनेछ जसमा वैकल्पिक चार्जिङ पोर्ट हुनेछ ।
कम्पनीले दिएको जानकारी अनुसार पहिलेदेखि नै एप्पलका धेरै ल्यापटप र आइप्याड मोडलमा काम गर्ने युएसबी–सी टाइप केबलले एयरपड्स प्रो र वायर्ड इयरपड हेडफोनहरूको नयाँ संस्करणहरूमा पनि काम गर्नेछ ।
युरोपेली युनियनले एप्पललाई ग्राहकको सुविधाका लागि आफ्नो छुट्टै लाइटनिङ चार्जिङ पोर्ट त्याग्न भनेको थियो । यसले मानिसहरूको पैसा मात्रै बचत हुँदैन ई–वेस्ट पनि कम हुनेछ किनभने चार्जरलाई पुनः प्रयोग गर्न सकिनेछ ।
यद्यपि, धेरैले यो कदमले आगामी केही वर्षहरूमा केबलका फोहोरमा व्यापक वृद्धि हुने चेतावनी दिएका छन् ।
एप्पलले मङ्गलवार आफ्नो लन्च कार्यक्रममा वातावरण सम्बन्धी धेरै प्रतिज्ञाहरू पनि गरेको थियो । एप्पलले आफ्नो वाच रेन्जको उत्पादनहरू पहिलो पटक कार्बन न्युट्रल हुने बताएको छ ।
नयाँ आईफोन र वाचमा थप रिसाइकल सामग्रीहरू प्रयोग गर्नेछन् । यसमा ब्याट्रीहरू पनि समावेश हुनेछन् ।
कम्पनीले आफ्नो कुनै पनि सामान तथा उत्पादनमा छालाको प्रयोग नगर्ने बताएको छ । कम्पनीले सन् २०३० सम्ममा कार्बन न्युट्रल बन्ने वाचासमेत गरेको छ ।
एप्पलका प्रमुख टिम कुकले नयाँ आईफोन १५ कम्पनीले बनाएको अहिलेसम्मकै उत्कृष्ट र शक्तिशाली आईफोन हुने बताएका छन् ।
आइफोन १५ र १५ प्लसमा थप उन्नत स्क्रिन र क्यामेरा सिस्टम हुनेछ । जबकि महँगो आईफोन १५ प्रो र प्रो म्याक्समा टाइटेनियम फ्रेम हुनेछ जसले फोनलाई थप बलियो बनाउनेछ ।
प्रो र प्रो म्याक्समा म्युट स्विचको सट्टामा ‘एक्सन बटन’ हुनेछ, जुन विभिन्न फङ्सनका लागि तपाईंको आवश्यकता अनुसार सेट गर्न सकिन्छ ।
नयाँ एप्पल वाचमा जेस्चर कन्ट्रोल पनि हुनेछ । घडी लगाएको हातमा दुई औँलाले ट्याप गर्दा घडी लगाउनेले फोन उठाउन र काट्न सक्नेछन् ।
धेरै विज्ञहरू यो पनि विश्वास गर्छन् कि यी नयाँ उत्पादन र पुराना उत्पादनबीच धेरै भिन्नता नहुँदा पनि ग्राहकहरू यी नयाँ उत्पादनका लागि उच्च मूल्य तिर्न तयार हुनेछन् ।
बेलायतमा आइफोन १५ प्रोको मूल्य ९९९ पाउन्ड अर्थात् एक लाख ६४ हजार रुपैयाँ हुनेछ ।
पीपी फोरसाइटका संस्थापक तथा विश्लेषक पाउलो पेस्केटोर भन्छन्, ‘सबै कुरा महँगो भइरहेका बेला ग्राहकहरूलाई बढी खर्च गर्न लगाउन सजिलो छैन ।’
पाउलो भन्छन्, ‘केही मानिसहरूलाई नयाँ सुविधाहरू मन पर्नेछ तर समग्रमा हेर्ने हो भने यसले प्रयोगकर्ता अनुभव सुधार गर्छन् र एप्पलको मुख्य ग्राहक वर्गलाई यो धेरै मनपर्छ ।’
मङ्गलवार एप्पलको सेयरमा पनि केही गिरावट आएको थियो । गत हप्ता चिनियाँ सरकारी अधिकारीहरूले एप्पल फोनको प्रयोगमा प्रतिबन्ध लगाएको खबर आएपछि कम्पनीको सेयरमा ठुलो गिरावट आएको थियो । लन्च इभेन्टले यो गिरावटको भरपाई गर्न असफल रह्यो ।
हुवावेले पनि चीनमा नयाँ स्मार्टफोन ल्याएको छ, जसका कारण कम्पनीका लगानीकर्ताहरू पनि अन्योलमा छन् ।
आर्थिक वर्ष २०२३ को दोस्रो त्रैमासिकमा विश्वभर फोनको बजारमा गिरावट आएको छ । अघिल्लो त्रैमासिकमा २९.४५ करोड फोनको तुलनामा दोस्रो त्रैमासिकमा २६.८ करोड फोन मात्र बिक्री भएको थियो ।
तर, एप्पलको बिक्री अन्य स्मार्टफोन निर्माताको तुलनामा कम भएको छ । काउन्टरपोइन्ट रिसर्चका अनुसार एप्पलको बिक्री ४.६५ करोडबाट घटेर ४.५३ करोडमा पुगेको छ ।
बीबीसी
