काठमाडौं । फिफा विश्वकप २०२६ सुरु हुने तयारीसँगै नेटफ्लिक्सले फुटबलप्रेमीका लागि नयाँ मोबाइल गेम सार्वजनिक गर्ने घोषणा गरेको छ। ‘फिफा विश्वकप: लञ्च इडिशन’ नामक यो खेल जुन ११ देखि नेटफ्लिक्स सदस्यहरूका लागि उपलब्ध हुने बताइएको छ।
डेल्फी इन्टरएक्टिभले विकास तथा प्रकाशन गरेको यस गेमले विश्वकपको रोमाञ्च र प्रतिस्पर्धालाई सरल र मनोरञ्जनात्मक ढंगले प्रस्तुत गर्ने लक्ष्य राखेको छ। खेल सिक्न सजिलो भए पनि उत्कृष्ट प्रदर्शन गर्न चुनौतीपूर्ण हुने कम्पनीको दाबी छ। खेलाडीहरूले एक्लै वा अनलाइन साथीहरूसँग खेल्न सक्ने सुविधा पाउनेछन्।
फिफा अध्यक्ष जियानी इन्फान्टिनोले नेटफ्लिक्स र डेल्फी इन्टरएक्टिभसँगको सहकार्यलाई फुटबल गेमिङ क्षेत्रमा नयाँ चरणको सुरुवातका रूपमा व्याख्या गरेका छन्। उनका अनुसार यस परियोजनाले विश्वभरका अरबौं समर्थकलाई डिजिटल माध्यमबाट जोड्ने अवसर सिर्जना गर्नेछ।
नेटफ्लिक्स गेम्स प्रमुख एलेन टस्कनले पनि विश्वकप २०२६ लाई ठूलो सांस्कृतिक घटनाका रूपमा उल्लेख गर्दै दर्शकहरूले घरमै बसेर गेमिङ अनुभवमार्फत प्रतियोगिताको रोमाञ्च लिन सक्ने बताएका छन्।
यो गेममा मोबाइल फोन कन्ट्रोलरका रूपमा प्रयोग हुनेछ भने टेलिभिजनलाई खेल मैदानको रूपमा प्रयोग गर्न सकिनेछ। प्रयोगकर्ताले टिभीको गेम्स ट्याबमार्फत खेल चयन गरी क्यूआर कोड स्क्यान गरेर मोबाइल सेटअप गरेपछि खेल सुरु गर्न सक्नेछन्।
खेलमा विश्वकपमा सहभागी ४८ टोली, १,२४८ खेलाडी र १६ वटा स्टेडियम समावेश गरिएको छ। यसको दृश्य अमेरिका, मेक्सिको र क्यानडामा आयोजना हुने विश्वकप रंगशालामा आधारित रहनेछ।
प्रारम्भिक परीक्षण संस्करण जुन ४ देखि ब्राजिल र जर्मनीमा सुरु भएको छ। पूर्ण संस्करण जुन ११ देखि अमेरिका, क्यानडा, बेलायत, फ्रान्स, इटाली, मेक्सिको, स्पेन, अस्ट्रेलियालगायत देशहरूमा उपलब्ध हुनेछ र क्रमशः अन्य देशमा विस्तार गरिने जनाइएको छ।
फिफाका अनुसार ‘लञ्च इडिशन’ प्रारम्भिक संस्करण हो, जसले छिटो र मनोरञ्जनात्मक गेमप्लेमा ध्यान दिएको छ। आगामी दिनमा थप सुविधाहरू, सुधार र नयाँ अपडेटहरू थपिने पनि जनाइएको छ।
