काठमाडौँ । औषधि व्यवस्था विभागले निर्धारित अवधिभित्र नवीकरण प्रक्रिया पूरा नगरेका देशभरका ५ हजार ३०२ औषधि पसलको सञ्चालनसम्बन्धी प्रमाणपत्र स्वतः खारेज भएको जनाएको छ।
विभागले मंगलबार जारी गरेको सार्वजनिक सूचनामार्फत कानुनले तोकेको समय सीमाभित्र अनुज्ञा पत्र, सिफारिस पत्र तथा सम्बन्धित प्रमाणपत्र नवीकरण नगरेमा ती स्वतः रद्द हुने व्यवस्थाअनुसार उक्त निर्णय कार्यान्वयन गरिएको स्पष्ट पारेको हो।
प्रमाणपत्र खारेज भएसँगै सम्बन्धित औषधि पसलहरूले कानुनी मान्यता प्राप्त सञ्चालन अनुमति गुमाएका छन्। यसका कारण ती पसलहरू औषधि बिक्री तथा वितरणसम्बन्धी कारोबार गर्न योग्य नरहने विभागले जनाएको छ।
विभागले औषधि व्यवसायी तथा सञ्चालकहरूलाई आफ्नो अनुमति पत्रको स्थिति यकिन गर्न, आवश्यक प्रशासनिक प्रक्रिया समयमै पूरा गर्न तथा औषधि कारोबार गर्दा प्रचलित कानुनी व्यवस्था र विभागीय निर्देशनको पूर्ण पालना गर्न आग्रह गरेको छ।
यसैबीच विभागले २०८३ जेठ २८ गतेसम्म नवीकरण अवधि समाप्त भई स्वतः खारेज भएका औषधि पसलहरूको विस्तृत विवरणसमेत सार्वजनिक गरेको जनाएको छ।
