काठमाडौँ । निरन्तर रूपमा उच्च स्तरको दबाब बढेपछि विद्युत् प्राधिकरणले काटिएका ६ वटा उद्योगमा आजै लाइन जोड्ने भएको छ। ऊर्जा मन्त्री दीपक खड्का र प्राधिकरणका कार्यकारी निर्देशकबिच मङ्गलवार नै विद्युत् जडान गर्ने बारेमा सहमति भएको छ ।
आज मन्त्रालयमा भएको छलफलमा बक्यौता रहेका उद्योगीसँग रकम उठाउने गरी विद्युत् जडान गर्न कुलमान घिसिङ तयार भएको मन्त्रालय स्रोतले जनाएको छ । तीन महिनाभित्र बक्यौता तिर्ने सहमतिमा लाइन जोड्न उनी तयार भएका हुन्।
ऊर्जा मन्त्री र कुलमान घिसिङबिच समझदारी बने पनि केही सञ्चालक समिति सदस्यले असहमति दर्ज गर्ने भएका छन्। प्रधानमन्त्री केपी शर्मा ओलीले काटिएका उद्योगको लाइन तत्काल जोड्न शुक्रवार निर्देशन दिएका थिए।
आइतबार र सोमबार संसदमा सम्बोधनका क्रममा लाइन जोड्नुपर्ने भन्दै उद्योगीको पक्षमा खुलेर वकालत गरेका छन्। प्रधानमन्त्रीको निर्देशन आएसँगै ऊर्जा मन्त्री दीपक खड्काले प्राधिकरण र सञ्चालक समितिलाई लाइन जोड्नुपर्ने भन्दै २ पटक बोर्ड बैठक राखी सके। तर सहमति हुन सकेन। मङ्गलवार बहुमत सदस्यले लाइन जोड्ने निर्णय गर्ने भएको छ।
