काठमाडौं । आगामी साउन १ गतेदेखि काठमाडौं उपत्यकामा ‘ब्लू बस’ सेवा सुरु गर्ने तयारी गरिएको छ। पहिलो चरणमा आठ वटा बस सञ्चालन गर्ने योजना बनाइएको छ।
महिलाको सुरक्षित यात्रा सुनिश्चित गर्ने उद्देश्यसहित सरकारले ल्याएको १०० दिने कार्यसूचीअन्तर्गत यो सेवा सुरु गर्न लागिएको हो। दीर्घकालमा सातै प्रदेशमा निःशुल्क सेवा विस्तार गर्ने लक्ष्य राखिएको छ।
पूर्वाधार विकास मन्त्रालयका अनुसार प्रारम्भिक १०० दिनभित्र २५ वटा बस सञ्चालनमा ल्याउने तयारी भइरहेको छ। सेवा सञ्चालनका लागि साझा यातायातले अर्थ मन्त्रालयसँग आवश्यक स्वीकृति प्रक्रिया अघि बढाइसकेको छ।
पहिलो चरणमा लगनखेल–बुढानीलकण्ठ रुटमा दुई बस, थानकोट–नागढुङ्गा–विमानस्थल रुटमा दुई बस र चक्रपथ क्षेत्रमा चार बस सञ्चालन गरिनेछ। चक्रपथका बसहरू दुवै दिशामा चलाइने जनाइएको छ।
