काठमाडौँ । आजभोलि फोटोभन्दा भिडियो सामग्रीलाई बढी आकर्षक मानिन्छ । विशेषगरी बी-रोल वा स्लाइडशो शैलीका भिडियोले दर्शकलाई राम्रो अनुभव दिने भएकाले यस्ता कन्टेन्टको प्रयोग बढ्दै गएको छ । यसैबीच, गुगल फोटोजमा रहेको एक उपयोगी फिचरले साधारण फोटोलाई नै सिनेम्याटिक भिडियोमा रूपान्तरण गर्न सकिने सुविधा दिएको छ ।
यस फिचरले फोटोको अगाडिको र पछाडिको भाग छुट्याएर स्वतः गतिशील दृश्यजस्तो प्रभाव सिर्जना गर्छ, जसले फोटोलाई जीवन्त र आकर्षक बनाउँछ । यो सुविधा निःशुल्क रूपमा उपलब्ध छ ।
यो प्रयोग गर्नका लागि सबैभन्दा पहिले गुगल फोटोज एप खोल्नुहोस् । त्यसपछि आफूले भिडियो बनाउन चाहेको फोटो चयन गर्नुहोस् ।
त्यसपछि स्क्रिनको माथिल्लो दायाँ कुनामा रहेको तीन डट (मेनु) मा ट्याप गरी ‘क्रियट’ विकल्प छान्नुहोस् । त्यसपछि देखिने विकल्पहरूबाट ‘सिनेम्याटिक फोटो’ चयन गर्नुहोस् ।
केही समयमै एपले उक्त फोटोलाई लगभग सात सेकेन्डको सिनेम्याटिक भिडियोमा रूपान्तरण गर्छ । तयार भएको भिडियो तपाईंले आफ्नो डिभाइसमा सेभ गरेर आवश्यकता अनुसार प्रयोग गर्न सक्नुहुन्छ ।
