काठमाडौँ – चालू आर्थिक वर्ष २०८२/८३ को पहिलो महिनामा व्यापार घाटा एक खर्ब १९ अर्ब ११ करोड रुपैयाँ पुगेको छ। नेपाल राष्ट्र बैंकले हिजो सार्वजनिक गरेको विवरणअनुसार यो घाटा अघिल्लो वर्षको यही अवधिको तुलनामा २.५ प्रतिशतले बढेको हो। गत वर्ष यस्तै अवधिमा व्यापार घाटा ०.४ प्रतिशतले मात्र बढेको थियो।
राष्ट्र बैंकका अनुसार साउन महिनामा कूल वस्तु आयात ११.४ प्रतिशतले बढेर एक खर्ब ४३ अर्ब ४ करोड रुपैयाँ पुगेको छ। अघिल्लो वर्ष यस्तै अवधिमा आयात ०.६ प्रतिशतले घटेको थियो।
यसैगरी, चालु वर्षको पहिलो महिनामा कूल वस्तु निर्यात ९५.७ प्रतिशतले बढेर २३ अर्ब ९३ करोड रुपैयाँ पुगेको छ। गत वर्ष सोही अवधिमा निर्यात ९.६ प्रतिशतले घटेको थियो।
वस्तुगत आधारमा भटमासको तेल, पाम तेल, पोलिस्टर धागो, अलैँची र जुटका सामानको निर्यात बढेको छ। तर जिङ्क सिट, पार्टिकल बोर्ड, ऊनी गलैंचा, पिना र चिया आदिको निर्यात भने घटेको राष्ट्र बैंकले जनाएको छ।
