काठमाडौँ । रुरु जलविद्युत परियोजना लिमिटेडले चालु आवको पहिलो त्रैमाससम्मको वित्तीय विवरण सार्वजनिक गरेको छ। जस अनुसार कम्पनीको कम्पनीको नाफा र आम्दानीमा सुधार देखिएको छ ।
सार्वजनिक विवरण अनुसार कम्पनीले चालु आवको पहिलो त्रैमाससम्म ३ करोड ७२ लाख रुपैयाँ खुद नाफा आर्जन गरेको छ। अघिल्लो आवको सोही अवधिको तुलनामा यो रकम २.२९ प्रतिशतले बढी हो। अघिल्लो आवको सोही अवधिसम्म कम्पनीले ३ करोड ६४ लाख रुपैयाँ खुद नाफा आर्जन गरेको थियो ।
त्यस्तै, कम्पनीको विद्युत् बिक्री आम्दानी ०.५६ प्रतिशतले बढेर ५ करोड ३३ लाख रुपैयाँ पुगेको छ । यो अवधिमा कम्पनीको वित्त खर्च २१ लाख ६० हजार रुपैयाँबाट घटेर १५ लाख ९३ हजार रुपैयाँमा सीमित बनेको छ। कम्पनीको प्रशासनिक खर्च भने १७ लाख ६५ हजार रुपैयाँबाट बढेर २१ लाख ९४ हजार रुपैयाँ पुगेको छ।
कम्पनीले नेपाल विद्युत् प्राधिकरणसँग भएको सम्झौताअन्तर्गतको अतिरिक्त २० प्रतिशतले हुन आउने ७ करोड ५९ लाख २८ हजार ८१८ रुपैयाँ प्राधिकरणसँग लिन बाँकी रहेको समेत जनाएको छ ।
४९ करोड ३३ लाख रुपैयाँ बराबरको चुक्तापूँजी भएको कम्पनीको रिजर्भमा २१ करोड ९६ लाख रुपैयाँ सञ्चित रहेको छ । यस अवधिसम्म कम्पनीको प्रतिसेयर आम्दानी ३०.२० रुपैयाँ, प्रतिसेयर नेटवर्थ १४४.५२ रुपैयाँ कायम रहेको छ ।
