कपिलवस्तु । कपिलवस्तुमा एउटै ट्रकमा फरक–फरक नम्बर प्लेट राखेर तस्करी गर्दै गरेको अवस्थामा मिनीट्रक प्रहरीले नियन्त्रणमा लिएकाे छ । कपिलवस्तु प्रहरीले भारतबाट अवैध रूपमा भित्र्याइएको चिनीसहित उक्त मिनीट्रकलाई नियन्त्रणमा लिएको हाे ।
भारतबाट अवैध रूपमा भित्र्याइएको चिनी छिमेकी जिल्ला अर्घाखाँची लैजाने क्रममा एउटै गाडीको दुईवटा नम्बर प्लेट राखी तस्करी गरेको अवस्थामा चिनी बरामद भएको हो ।
जिल्ला प्रहरी कार्यालय कपिलवस्तुकी प्रहरी निरीक्षक शैलेश्वरी बोहोराका अनुसार तौलिहवा–गोरुसिंगे सडकअन्तर्गत बुद्धभूमि नगरपालिका– १० रामघाट पुलनजिकै प्रहरीले ६४ बोरा चिनी बोकेको मिनीट्रक पक्राउ गरेको हाे ।
प्रहरीले जाँच गर्ने क्रममा अगाडि रातो नम्बर प्लेटको लु.१क ५४५२ र पछाडि कालो नम्बर प्लेटको लु.२ख ५४८६ नम्बरको मिनीट्रकमा ६४ बाेरा चिनीसहित बरामद गरिएको बोहोराले बताइन्।
प्रहरीले मिनीट्रकका चालकसमेत नियन्त्रणमा लिइ अनुसन्धान कार्य पूरा गरी सुठौली भन्सार कार्यालय पठाएको छ ।
