काठमाडौं । विशेष अदालतले रिडी हाइड्रोका तत्कालीन अध्यक्ष गुरुप्रसाद न्यौपानेलाई सम्पत्ति शुद्धीकरणको मुद्दामा दोषी ठहर गर्दै एक वर्ष कैद तथा ३ करोड ९८ लाख जरिवानाको फैसला गरेको छ । विशेष अदालतका अध्यक्ष न्यायाधीश टेकनारायण कुँवर र न्यायाधीशहरु रामबहादुर थापा तथा मुरारीबाबु श्रेष्ठको इजलासले उक्त फैसला गरेको हो ।
अध्यक्ष भएको वेला रिडी हाइड्रोपावरमा भित्री कारोबार गरेर गैरकानूनी सम्पत्ति आर्जन गरेको अभियोगमा सम्पत्ति शुद्धीकरण विभागले गत कात्तिक २३ गते विशेष अदालतमा मुद्दा दायर गरेको थियो ।
गत चैत ७ गते नै उनी दोषी ठहर भइसके पनि अदालतले आइतबार सजाय निर्धारण गरेको हो ।
सेयरको भित्री कारोबारलाई सम्पत्ति शुद्धीकरणको कसूरमा मुद्दा दायर गरिएएको यो पहिलो पटक हो ।
