काठमाडौँ । नेपाल सुनचाँदी व्यवसायी महासङ्घले निरन्तरको आन्दोलन पश्चात् आज सुनचाँदीको भाउ तोकेको छ। सुनचाँदी व्यवसायीहरू विलासिता करको विरोधमा आन्दोलित भएका कारण असार १९ गतेदेखि सुनको भाउ तोकिएको थिएन ।
हिजो सरकार र सुनचाँदी व्यवसायीबिच सहमति भएपछि आन्दोलन स्थगित भएर आजदेखि पसल खुलेका छन् । महासंघले आठ दिनपछि सुनचाँदीको दैनिक मूल्य निर्धारण गरेको हो ।
आज सुनको भाउ तोलाको एक लाख ९१ हजार आठ सय रुपैयाँ तोकिएको नेपाल सुनचाँदी व्यवसायी महासङ्घले जनाएको छ । त्यस्तै आज चाँदीको भाउ तोलाको दुई हजार दुई सय २० रुपैयाँ कायम भएको छ ।
यसअघि असार १९ गते सुनको भाउ तोलाको एक लाख ९२ हजार एक सय रुपैयाँ कायम भएको थियो । त्यस्तै चाँदी तोलाको दुई हजार एक सय ७० रुपैयाँ कायम भएको थियो ।
