काठमाडौँ । मेडिकल कलेज (केएमसी), सिनामंगलमा दोस्रो पटक सफल कलेजो (लिभर) प्रत्यारोपण सफल भएको छ । नेपाली चिकित्सा क्षेत्रको लागि ऐतिहासिक सफलता भएको चिकित्सकहरूको भनाई छ । देशमै कलेजो प्रत्यारोपण सम्भव छ भन्ने विश्वासलाई बलियो बनाएको उनीहरूको भनाई छ ।
केही महिना अगाडि डडेलधुरा जिल्लाको अमरगढी नगरपालिका–५ निवासी ४० वर्षीय प्रदीप नगरकोटीको सफल प्रत्यारोपण गरेको केएमसीले दोस्रो पटक मोरङ जिल्ला बुढीगंगा गा.पा.निवासी रक्षा बिस्टको सफल कलेजो प्रत्यारोपण गरेको हो।
जटिल र जोखिमपूर्ण मानिने कलेजो प्रत्यारोपण प्रक्रिया नेपालमै सफलतापूर्वक सम्पन्न हुनु देशको स्वास्थ्य प्रणालीको गुणस्तर र प्रविधिमा भएको प्रगतिको प्रमाण भएको चिकित्सकहरूको भनाई छ ।
रक्षा बिस्टलाई उनका दाजु विपिन विक्रम बिस्टले रक्षा बन्धनको उपहार स्वरूप भन्दै कलेजो दिएका हुन् । पत्रकार सम्मेलनमा भावुक बनेका रक्षा बिस्टका दाजु विपिन बिस्टले आफू कलेजो दिन पाएकोमा खुशी भएको बताउँदै अस्पताल र उपचारमा संलग्न चिकित्सकलाई धन्यवाद ज्ञापन गरेका छन् ।
नेपाली समाजमा पुरुषलाई महिलाले नै धेरैजसो अगं दिने प्रचलन कायम रहे पनि विपिनले उक्त प्रचलनको क्रमभङ्ग गर्ने काम गरेको उपचारमा संलग्न डाक्टरहरूको भनाई छ ।
कम खर्चमा अब नेपालमा पनि कलेजो प्रत्यारोपण गर्न सकिन्छ है भन्ने राम्रो सन्देश प्रवाह भएको कलेजो प्रत्यारोपण सर्जन डाक्टर रोशन घिमिरेले बताएका छन् ।
