काठमाडौं । काठमाडौं महानगरपालिकाले ललिता निवास परिसरमा निर्माण भएका भवनहरु हटाउने भएको छ । महानगरपालिकाले सोमबार एक सूचना प्रकाशन गरी ललिता निवासले चर्चेको जग्गामा भवन निर्माण गर्न स्वीकृति नदिने, उक्त क्षेत्रमा भवन निर्माण गर्न रोक्का समेत गरिएको बताएको छ ।
महानगरपालिकाको सूचनामा भनिएको छ, ‘काठमाडौं महानगरपालिका वडा नं. ४ बालुवाटारस्थित ललिता निवास र त्यसले चर्चेको जग्गामा भवन निर्माण गर्न अब स्वीकृति नदिने, निर्माण सम्पन्नताको प्रमाणपत्र जारी नगर्ने र उक्त क्षेत्रको कुनै जग्गामा भवन निर्माण कार्य भइरहेको भए सो कार्य रोक्का राख्नु पर्नेछ ।’
यदि सूचनाको उल्लङ्घन गरी कसैले सो क्षेत्र भित्रका जग्गामा भवन संरचना निर्माण गरेमा स्थानीय सरकार सञ्चालन ऐन, २०७४ को दफा ३९ बमोजिम त्यस्तो भवन संरचना भत्काइने र भत्काउँदा लागेको खर्च समेत सम्बद्ध घरधनीबाट सरकारी बाँकी सरह असुल उपर गरिने महानगरपालिकाले चेतावनी दिएको छ ।
