काठमाडौैं । उपप्रधानमन्त्री एवं अर्थमन्त्री विष्णुप्रसाद पौडेलले पूर्वाधार विकासमा देखिएको वित्तीय चाप समाधानका लागि सरकारले वैकल्पिक विकास वित्त परिचालनसम्बन्धी विधेयक ल्याएको स्पष्ट पारेका छन् ।
राष्ट्रियसभाको आजको बैठकमा प्रतिनिधिसभाबाट प्राप्त उक्त विधेयकमाथि छलफल भइरहेका बेला सांसदहरूले उठाएका प्रश्नको जवाफ दिँदै उनले ट्रेजरीमात्रै भरपर्न सकिने अवस्था नरहेको र वैकल्पिक स्रोत आवश्यक रहेको बताए ।
प्रतिनिधिसभाबाट छोटो समयमा विधेयक पारित भएको स्मरण गराउँदै उनले राष्ट्रियसभाले पनि विषयगत समितिमा नपठाई सभाबाटै पारित गरिदिन आग्रह गरे ।
सो छलफलमा विभिन्न सांसदहरूले भाग लिएका थिए भने बैठकले विधेयकमाथि विचार गरियोस् भन्ने प्रस्तावलाई सर्वसम्मतले स्वीकृत गरेको छ ।
सभाका अध्यक्ष नारायणप्रसाद दाहालले सांसदहरूले आवश्यक परेमा संशोधन प्रस्ताव दर्ता गर्न सक्ने जानकारी गराए । बैठकमा अन्य विधेयकसम्बन्धी सन्देश टेबुल गरिनुका साथै संसदीय सुनुवाई समितिमा अञ्जान शाक्यलाई मनोनयन गरिएको जानकारी दिइयो ।
राष्ट्रियसभाको अर्को बैठक भदौ १६ गते अपराह्न १ः१५ बजे बस्नेछ ।
