काठमाडौँ । माओवादी केन्द्रका प्रवक्ता अग्निप्रसाद सापकोटाले सुन काण्डमा दोषी प्रमाणित भए सरकारले कसैलाई पनि नछाड्ने बताएका छन् । प्रवक्ता भएपछि पार्टी कार्यालय पेरिसडाँडामा बुधवार पहिलोपटक प्रेसमिट गर्दै उनले यस्ताे बताएका हुन् ।
प्रवक्ता सापकोटाले सुन प्रकरणमा दोषी प्रमाणित भए उपाध्यक्ष कृष्णबहादुर महरामाथि पनि कारबाही हुने बताए । उनले तथ्य र प्रमाण पुष्टि भए उपाध्यक्ष महरामाथि पनि सरकारले अनुसन्धान अगाडि बढाउने बताएका हुन् ।
उनले भने, ‘सुन प्रकरणमा महराको विषयमा बाहिर मिडियामा पनि धेरै समाचार आएका छन् । यदि तथ्य र प्रमाणले पुष्टि भए उहाँमाथि पनि छानबिन हुन्छ ।’
सुन प्रकरण लगायत विभिन्न काण्डको छानबिनलाई प्रधानमन्त्रीले निष्कर्षमा पुर्याउने प्रतिबद्धता जनाएकाले सबैले सरकारलाई सहयोग गर्नुपर्ने उनको भनाइ छ ।
