काठमाडौँ। मृत्यु भएका मान्छेहरूको पेन्सनलाई बैंकबाट आफैँले झिकेर लिँदै ठगी गर्ने गरेको आरोपमा राष्ट्रिय वाणिज्य बैंकका कार्यालय सहयोगी पक्राउ परेका छन् ।
वाणिज्य बैंकको महाराजगन्ज शाखाका कार्यालय सहयोगी पुण्यप्रसाद अधिकारीले बैंकमा पेन्सन खाता भएका र मृत्यु भइसकेका व्यक्तिको आफैँले पेन्सन लिने गरेको पाइएकोले जिल्ला प्रहरी परिसर काठमाडौँले उनलाई पक्राउ गरेको हो ।
पक्राउ परेका अधिकारीलाई बैंकिङ कसुर र ठगीमा अनुसन्धानका लागि हिरासतमा राख्न उच्च अदालत पाटनसँग प्रहरीले अनुमति मागेको छ । प्रहरीका अनुसार रामेछापको लिखु तामाकोशी गाउँपालिका घर अधिकारीले कम्तीमा ८ जनाको पेन्सन पट्टाबाट आफैँले पेन्सन लिएको अनुसन्धानमा खुल्न आएको बताएको छ ।
पेन्सन लिइरहेका व्यक्तिको नागरिकता र पुरानो फोटो टाँसेर नयाँ नमुना कार्ड बनाएर बैंकमा हाजिर भइरहेको र देखाएर पेन्सन भने आफैँले लिने गरेको प्रहरीले जनाएको छ ।
