काठमाडौँ। नेशनल लाइफ इन्स्योरेन्सले व्यतीत बीमालेखमा ब्याज छुटको व्यवस्था गरेको छ।
इन्स्योरेन्स कम्पनीले व्यतीत बीमालेख पुनर्जागरण वा नवीकरण गराउँदा शतप्रतिशतसम्म ब्याज छुटको व्यवस्था गरेको जनाएको छ । कम्पनीले जेठ १० गतेदेखि असार १५ गतेभित्र नवीकरण बीमाशुल्क भुक्तानी गर्ने बीमितलाई ब्याज छुट प्रदान गरिने जानकारी दिएको छ ।
विस २०७७ चैत २ गतेदेखि हालसम्म व्यतीत भएका बीमालेखहरुमा शतप्रतिशत, २०७४ चैत २ गतेदेखि २०७७ चैत १ गतेसम्म व्यतीत भएका बीमालेखहरुमा ७५ प्रतिशत र अन्तिम बीमाशुल्क भुक्तानी गरेको मितिबाट २०७४ चैत १ गतेसम्म व्यतीत भएका बीमालेखहरुमा ६० प्रतिशत ब्याज छुटको व्यवस्था गरेको छ।
एक पटक विलम्ब शुल्कमा छुट लिई सकेका बीमितहरुलाई पुरा बीमा अवधिभर पुनः छुट नदिइने कम्पनीको भनाई छ । पुनर्जागरण मितिले २ वर्षभित्र समाप्ति हुने बीमालेखहरुको हकमा विलम्ब शुल्क छुटको सुविधा भने पाउन नसकिने कम्पनीको भनाई छ ।
