काठमाडौँ। नेपाल विद्युत् प्राधिकरणले डेडिकेटेड तथा ट्रंक लाइन प्रयोग गरेवापतको विद्युत् महसुल बक्यौता नबुझाएका कम्पनीको दिनप्रतिदिन विद्युत् लाइन काट्न थालेको छ ।
सोही अन्तर्गत जगदम्बा स्टिलको विद्युत् लाइन पनि काटेको छ । प्राधिकरणले विद्युत् महसुल नतिरेको भन्दै जगदम्बा स्टिलको लाइन काटेको हो । डेडिकेटेड तथा ट्रंक लाइन प्रयोग गरेबापत जगदम्बा स्टिलले प्राधिकरणलाई १ अर्ब ६० करोड रुपैयाँ बक्यौता रकम बुझाउन बाँकी रहेको छ ।
प्राधिकरणले बिहीबार जगदम्बा सिन्थेटिक्स प्रालि र हुसाल स्टिलको लाइन काटेको थियो । जगदम्बा सिन्थेटिक्सले १६ करोड रुपैयाँ बढी र हुलास स्टिलले ११ करोड २९ लाख रुपैयाँ बक्यौता भुक्तानी गर्न बाँकी छ ।
यस अगाडि गत मंगलबार पनि प्राधिकरणले बक्यौता भुक्तानी नगरेको भन्दै रिलायन्स स्पेनिङ मिल्स, घोराही सिमेन्ट र अर्घाखाँची सिमेन्टको लाइन काटेको थियो । यससँगै प्राधिकरणबाट लाइन काटिने उद्योगको सङ्ख्या ६ पुगेको छ ।
