काठमाण्डौ। युट्युबकी पूर्व सीईओ तथा लामो समय गुगलको कार्यकारी रहेकी सुसान वोजिकीको निधन भएको छ। फोक्सोको क्यान्सरसँग विगत २ वर्षदेखि जुधिरहेकी वोजिकीको ५६ वर्षको उमेरमा शनिबार निधन भएको हो ।
सोसल मिडिया प्लाटफर्म एक्समा एक पोस्ट गर्दै पिचाइले सुसानको निधनबाट आफू निकै दुस्खी भएको भन्दै उनी गुगलको इतिहासको केन्द्र भागमा रहेकी उल्लेख गरेका छन् । कुनै बेला कहिल्यै नसुनिएका गुगलका सर्वाधिक महत्वपूर्ण व्यक्तिको रुपमा समेत चर्चा हुने गरेकी सुसान सन् १९९८ मा गुगल कम्पनीको स्थापनाको बेलामै उपस्थित थिइन् ।
सुसानले प्रमुख कार्यकारी अधिकृतको रुपमा ९ वर्षसम्म गुगलको भिडियो स्ट्रिमिङ प्लाटफर्म युट्युबलाई हाँकिन् । गत वर्ष सन् २०२३ मा मात्रै उनले आफ्नो परिवार, स्वास्थ्य र व्यक्तिगत रुचिको विषयमा केन्द्रित हुने भन्दै युट्युबको सीईओ पदबाट राजीनामा दिएकी थिइन् ।
सुसान विश्वको प्रविधि उद्योगमा उच्च व्यवस्थापकीय भूमिका निर्वाह गर्ने निकै कम महिलामध्ये एक थिइन् । सन् २०१३ मा बीबीसीसँग कुरा गर्दै उनले भविष्य डिजिटल रुपमा प्रभावी हुने भन्दै युवती तथा किशोरीहरुलाई प्रविधि क्षेत्रमा प्रवेश गर्न प्रोत्साहन गर्नुपर्ने बताएकी थिइन् ।
