काठमाडौं । अमेरिका र इरानबीचको तनाव पुनः चर्किएपछि अन्तर्राष्ट्रिय बजारमा कच्चा तेलको मूल्य एकाएक बढेको छ। अमेरिकी राष्ट्रपति डोनाल्ड ट्रम्पले युद्धविराम समाप्त भएको संकेत दिएसँगै ऊर्जा बजारमा तीव्र प्रतिक्रिया देखिएको हो।
ट्रम्पको अभिव्यक्तिपछि ब्रेन्ट क्रुडको मूल्य करिब ५ प्रतिशतभन्दा बढीले वृद्धि भई प्रतिब्यारेल ७७ डलर नाघेको छ। त्यस्तै, डब्लूटीआई क्रुडको मूल्य पनि झण्डै ५ प्रतिशतले बढ्दै ७३ डलरभन्दा माथि पुगेको छ।
टर्कीको अंकारामा भएको नाटो शिखर सम्मेलनका क्रममा ट्रम्पले इरानसँगको वार्ताको सम्भावना कमजोर भएको संकेत दिएका थिए। उनले पछिल्लो अवस्थालाई ध्यानमा राख्दै थप संवादलाई समयको अपव्यय जस्तो देखिएको बताएका छन्।
यसबीच, दुवै देशले एकअर्कामाथि युद्धविराम उल्लङ्घन गरेको आरोप लगाएका छन्। अमेरिकी सेनाले स्ट्रेट अफ होर्मुज क्षेत्रमा भएको आक्रमणको प्रतिक्रिया स्वरूप इरानका सैन्य संरचनामाथि हवाई कारबाही गरेको जनाएको छ।
अमेरिकी सेनाका अनुसार आक्रमणमा इरानका हवाई प्रतिरक्षा प्रणाली, नियन्त्रण केन्द्र तथा जलयानसम्बन्धी सैन्य संरचनालाई लक्षित गरिएको थियो। साथै केही साना सैन्य डुंगा नष्ट गरिएको दाबी पनि गरिएको छ।
तेल आपूर्तिको प्रमुख मार्ग मानिने स्ट्रेट अफ होर्मुज क्षेत्रमा तनाव बढ्न सक्ने चिन्ताले लगानीकर्ताहरू सतर्क बनेका छन्। यस क्षेत्रमा अवरोध कायम रहेमा ऊर्जा आपूर्ति, मूल्यवृद्धि र विश्व अर्थतन्त्रमा दबाब पर्न सक्ने आकलन गरिएको छ।
