काठमाडौं । मिटरब्याज पीडितले काठमाडौंमा प्रदर्शन छन् । मंगलबार मिटरब्याज पीडितको एक समूहले उपप्रधानमन्त्री तथा गृहमन्त्री नारायणकाजी श्रेष्ठको राजीनामा माग गर्दै प्रदर्शन गरेकाे हाे ।
मिटरब्याज तथा ठगीविरुद्ध किसान मजदुर संघर्ष समितिले काठमाडौंको शान्तिवाटिकादेखि बानेश्वरसम्म प्रदर्शन गरेको थियो । सो प्रदर्शनमा सहभागीले गृहमन्त्रीको राजीनामा माग गरेका हुन् ।
सरकारले मिटरब्याज पीडितको समस्या समाधान गर्ने भन्दै मुलुकी ऐन संशोधनसमेत गरिसकेको छ । तर संघर्ष समितिले उक्त कानुनले पनि मिटरब्याज पीडितको समस्या समाधान नहुने भन्दै प्रदर्शन गरेको हो ।
मिटरब्याजसम्बन्धी संसदले पारित गरेको कानुनका केही विषय पीडितको पक्षमा नभएको उनिहरूकाे भनाइ छ । यसमा गृहमन्त्रीको भूमिका रहेकाले भन्दै गृहमन्त्रीको राजीनामा माग गरेको प्रदर्शनकारीले बताएका छन् ।
‘पहिलेको अध्यादेशमा धेरै कुरा ठीक थिए, तर राजनीतिक दलहरुको सेटिङमा अध्यादेश निष्क्रिय पारियो, पछि ४ बुँदामा संशोधन गर्दा कानुन साहु महाजनको पक्षमा गयो’ मिटरब्याज पीडित प्रदर्शनकारीले भने ।
आइतबार प्रतिनिधिसभाबाट मिटरब्याजसम्बन्धी विधेयक पारित भएकाे थियाे ।
