काठमाडौँ । इन्फरमेसन सेक्युरिटी रिस्पोन्स टिम नेपालले ‘राष्ट्रिय साइबर सुरक्षा नीति २०८०’ सम्बन्धी कार्यक्रमको आयोजना गरेको छ ।
इन्फरमेसन सेक्युरिटी रिस्पोन्सले सेन्टर फर साइबर सेक्युरिटी रिसर्च एण्ड इन्नोवेसन र टेक्सस कलेज अफ म्यानेजमेन्ट एण्ड आईटीको सहयोगमा उक्त कार्यक्रम आयोजना गरेको हो। कार्यक्रममा विभिन्न क्षेत्रका प्रमुख सरोकारवालाहरूलाई समावेश गरी एक सबल र समावेशी साइबर सुरक्षा नीति विकासमा योगदान पुर्याउने अवसर प्रदान गरिएको इन्फरमेसन सेक्युरिटी रिस्पोन्सले उल्लेख गरेको छ ।
यो परामर्शको उद्देश्य नीति सबै सरोकारवालाहरूको विविध दृष्टिकोण र आवश्यकतालाई समेट्ने सुनिश्चितता गर्नुका साथै, देशभर एक सुरक्षित र लचिलो डिजिटल वातावरणलाई प्रोत्साहन दिने रहेको इन्फरमेसन सेक्युरिटी रिस्पोन्सले जनाएको छ ।
अधिकारीले नेपालको डिजिटल पूर्वाधारलाई सुदृढ गर्नुपर्ने महत्त्वलाई रेखांकित गरे । बढ्दो साइबर खतराहरूबाट जोगाउन र देशका डिजिटल सम्पत्तिहरूको दीर्घकालीन लचिलोपन सुनिश्चित गर्न मद्दत पुर्याउने उनको भनाइ छ ।
फिनटेक विशेषज्ञ गणेश घिमिरेले नेपालमा सीमापार आर्थिक लेनदेनका सम्भावना र चुनौतीहरूको गहिरो विश्लेषण गर्दै अन्तर्राष्ट्रिय वित्तीय लेनदेनमा रहेका साइबर सुरक्षा कमजोरीहरूलाई उजागर गरे । इनफो डेवलपर्सको तर्फबाट प्रतिनिधित्व गर्दै रेशम भण्डारीले ग्रासरुट लेभलमा साइबर साक्षरताको महत्त्वमा जोड दिए । उनले सामान्य जनसंख्यामा साइबर खतराहरूको बारेमा चेतना र बुझाइ वृद्धि गर्नुपर्ने आवश्यकता औँल्याए, जसले सुरक्षित डिजिटल वातावरणको सिर्जना गर्न मद्दत गर्दछ।
आईटी विभागका प्रमुख डा सुमन थपालियाले साइबर सुरक्षा नीति निर्माणमा सबै सम्बन्धित सरोकारवालाहरूको समावेशीकरणको महत्त्वमा जोड दिए । उनले समावेशी दृष्टिकोणले एक व्यापक र प्रभावकारी ढाँचा सिर्जना गर्न महत्त्वपूर्ण भूमिका खेल्ने बताए । इन्फरमेसन सेक्युरिटी रिस्पोन्सका महासचिव ध्रुबराज शर्मा ९सुदीप० ले नेपालका डिजिटल पूर्वाधारको सुरक्षा गर्न साइबर सुरक्षा शिक्षा र प्रभावकारी घटना व्यवस्थापनको महत्त्वमा जोड दिए ।
उनले साइबर खतराहरूको सामना गर्न व्यक्तिहरू र संस्थाहरूलाई द्रुत रूपमा प्रतिक्रिया दिन तयारी गर्न सबै स्तरमा साइबर सुरक्षा सचेतना र प्रशिक्षणको महत्त्वलाई रेखांकित गरे । इन्फरमेसन सेक्युरिटी रिस्पोन्स टिम नेपालले नेपालमा साइबर सुरक्षा सुधार गर्न उद्योग, शैक्षिक क्षेत्र र सार्वजनिक क्षेत्रभर सुरक्षा सचेतनाको प्रवर्द्धन गर्दै आएको छ।
