काठमाडौँ। गोरखा मिडियाका तत्कालीन प्रबन्ध निर्देशक तथा रास्वपाका सभापति रवि लामिछानेमाथि प्रहरीले विशेष निगरानी बढाएसँगै रास्वपामा तरङ्ग पैदा भएको छ । सोही संस्थाका तत्कालीन सञ्चालक समितिका सदस्य छविलाल जोशी बन्जाडे पक्राउ परेसँगै तत्कालीन पार्टनर लामिछानेमाथि पक्राउको दबाब बढेको बुझिएको छ
यस विषयमा लामिछानेले भने आफूले गल्ती नगरेको कारण कुनै पनि डर त्रासमा नरहेको बताउँदै आएका छन् । कास्कीस्थित सूर्यदर्शन सहकारीका बचतकर्ताको रकम अपचलन गरेको आरोपमा सहकारी ठगी छानबिन विशेष समितिले गरेको सिफारिसको आधारमा रविमाथि कारबाहीको दबाब बढेसँगै प्रहरीले उनको निगरानी बढाएको छ ।
लामिछानेले ग्यालेक्सी मिडियामा रहँदा धमाधम करोडौँ चेक काटेका तथ्यहरू बाहिरिएसँगै रवि प्रहरीको निगरानीमा परेका हुन् ।
सभापति लामिछानेले गिरफ्तारी दिने आधिकारिक निर्णय भएको लगायतका समाचार बाहिरिएपछि उक्त विषय आधारहीन र सभापति लामिछानेको चरित्रहत्या गर्नलाई गरिएको प्रयास बाहेक केही नभएको रास्वपाका प्रमुख सचेतक सन्तोष परियारले जानकारी दिएका छन् ।
आर्थिक भ्वाईससंग संक्षिप्त कुराकानी गर्दै सचेतक परियारले भने 'सभापति ज्यूलाई बदनाम गर्न र जनताको विश्वास माथि घात गर्न भएको अनेकौँ प्रयास मध्येको एक यो पनि हो ! उहाँले गिरफ्तारी दिने विषय पार्टीमा छलफल भएको छैन ।' साथै उनले सभापति लामिछाने सहकारी रकम अपचलन प्रकरणमा निर्दोष भएको तर दोषी देखाउन राज्य स्तरबाटै अनेकौँ हर्कत भएको जानकारी दिएका छन् ।
