काठमाडौँ। राष्ट्रिय स्वतन्त्र पार्टीका सांसद असिम शाहले व्यवस्थित र नियन्त्रित रूपमा सामाजिक सञ्जाल टिकटक खोल्न सरकारसँग आग्रह गरेका छन् ।
प्रतिनिधिसभाको शुक्रवारको बैठकमा बोल्दै शाहले फेसबुक र इन्स्टाग्रामजस्ता सामाजिक सञ्जाल विना रोकटोक चलिराखेको तर टिकटकबाट मात्रै अपराध र विकृति फैलिने भन्ने कुरा स्वीकार्य हुन नसक्ने बताउँदै टिकटक खोल्न सरकार समक्ष आग्रह गरेका हुन।
टिकटक बन्द हुँदा टेलिकम कम्पनीलाई ठुलो आर्थिक क्षति पुगेको, घरेलु र स्वतन्त्र व्यवसायी बेरोजगार भएको तथ्य पेश गर्दै उनले सरकारले बन्द गरे पनि भीपीएनबाट ठुलो सङ्ख्यामा टिकटक चलिराखेको उनले बताए ।
सरकारले अपराध र विकृति फैलिएको भन्दै टिकटकमा लगाएको प्रतिबन्धको औचित्य के भयो त ? सरकारले टिकटक बन्द भएपछि विकृति वा अपराध घटेको तथ्यांक वा प्रतिवेदन त छैन होला।
टिकटकबाट साना व्यवसायीले गरिरहेका घरेलु व्यवसाय र स्वतन्त्र व्यवसायी बेरोजगारी र विस्थापित भएको, यसको हिसाब गरिसाध्य छैन । अरु पनि सूचीकृत नभएका फेसबुक इन्स्टाग्रामजस्ता सामाजिक सञ्जाल विना रोकटोक चलिराखेका छन् । तर टिकटकमा मात्रै अपराध र विकृति फैलिने कुरा स्वीकार्य छैन उनले बताएका हुन् ।
