काठमाडौँ । श्रम, रोजगार तथा सामाजिक सुरक्षा मन्त्री डोलप्रसाद अर्यालले सीमित व्यक्तिहरूले सहकारीलाई बदनाम गराउँदैमा समग्र सहकारी नराम्रो नै भएको छ भन्न नमिल्ने बताएका छन्।
प्रथम सहकारी रोजगार मेलाको समापन समारोहलाई सम्बोधन गर्दै मन्त्री अर्यालले यस्तो बताएका हुन् । ‘चार खर्बभन्दा बढी बचत सहकारीमा छ । नेपालमा सहकारीको माध्यमबाट भएको विकास, रोजगारी र यस क्षेत्रले दिएको योगदान धेरै छ ।
आफ्नो भनाइमा थप स्पष्ट पार्दै उनले भने, ‘केही मानिसहरू सहकारीको बदनाम गर्न लागिरहेका छन् । सहकारीको बदनाम गर्ने बित्तिकै सहकारी नराम्रो भन्ने खालको भाष्य स्थापना गर्न दिन हुँदैन । केही व्यक्तिले सहकारीमा नराम्रो काम गर्दैमा सबै सहकारीलाई नराम्रो भन्न मिल्दैन ।’
सहकारीले देशमा गरेको योगदानबारे बहस गर्नु पर्ने उनले सुझावसमेत दिए । सहकारीले भोलिका दिनमा कसरी काम गर्ने र सहकारीलाई कसरी अब चलाउने भन्नेबारे चर्चा गर्न ढिला गर्न नहुने मन्त्री अर्यालको भनाई छ ।
