काठमाडौँ । बैंकिङ्ग प्रणालीको निक्षेप हालसम्मकै उच्च बिन्दुमा पुगेको छ । बैंक तथा वित्तीय संस्थाहरूको निक्षेपको आकार ७० खर्ब नाघेको छ। गत आइत (असार १ गते) सम्म वाणिज्य बैंक, विकास बैंक तथा फाइनान्स कम्पनीहरूद्वारा संकलित निक्षेप (डिपोजिट) ७० खर्ब १ अर्ब रुपैयाँ पुगेको छ ।
राष्ट्र बैंकका अनुसार पछिल्लो एक दिनमा मात्रै बैंकिङ प्रणालीमा २ अर्ब रुपैयाँले निक्षेप थपिएको छ ।
बैंक तथा वित्तीय संस्थाहरूको कुल निक्षेपमध्ये वाणिज्य बैंकहरुको निक्षेप ६२ खर्ब ६२ अर्ब तथा अन्य वित्तीय संस्थाहरूको निक्षेप ७ खर्ब ४० अर्ब पुगेको राष्ट्रबैंकले जनाएको छ। तर, वित्तीय प्रणालीमा निक्षेपको तुलनामा कर्जा भने विस्तार हुन सकेको छैन ।
केन्द्रीय बैंकले मौद्रिक नीतिमार्फत बैंक तथा वित्तीय संस्थालाई निक्षेपको ९० प्रतिशतसम्म अर्थात् कर्जा/निक्षेप अनुपात (सीडी रेसियो) ९० प्रतिशतसम्म कायम गर्न पाउने सुविधा दिएको छ । तर हाल बैंकहरूले ७८.४० प्रतिशत मात्र सीडी रेसियो कायम गरेका छन् । यसलाई हेर्दा बैंकहरुसँग ७ खर्ब ३२ अर्ब रुपैयाँ लगानीयोग्य रकम देखिन्छ ।
