काठमाडौं । जेन–जी युवाको आन्दोलन हिंस्रक बन्दै जाँदा मंगलबार साँझ देशको सर्वोच्च न्यायिक निकाय सर्वोच्च अदालत आगलागीमा परेर पूर्णरुपमा जलेर ध्वस्त भएको छ । भवन क्षतिग्रस्त भएपछि त्यहाँ चलिरहेका सबै मुद्दाहरूको सुनुवाइ अनिश्चितकालका लागि स्थगित गरिएको अदालत प्रशासनले जनाएको छ ।
आगलागी नियन्त्रणबाहिर
संसद भवन वरिपरिको घेराबन्दी तोड्दै आक्रोशित भीड सर्वोच्च अदालत परिसरसम्म पुगेपछि आगजनी भएको हो । प्रत्यक्षदर्शीहरूका अनुसार, सुरक्षाकर्मीले अश्रुग्यास र पानीको फोहोरा प्रयोग गरेर रोक्ने प्रयास गरे पनि भीड नियन्त्रणबाहिर पुगेपछि अदालत भवनमा आगो लाग्यो ।
अभिलेखालयसहित सबै नष्ट
प्रारम्भिक विवरणअनुसार, आगलागीले अदालतको अभिलेखालय, मुद्दा दर्ता प्रणाली, पुराना फैसलासहितका महत्वपूर्ण कागजात जलेर नष्ट भएका छन् । यससँगै हजारौं मुद्दा प्रभावित हुने देखिएको छ । “सुनुवाइ गर्ने कुनै आधार नै बाँकी नभएकाले सबै प्रक्रिया तत्काल अनिश्चितकालका लागि रोकिएको हो,” अदालत प्रशासनले जनाएको छ ।
पक्राउ र अनुसन्धान
सुरक्षाकर्मीहरूले आगजनीमा संलग्न भएको आशंका गरिएका केही प्रदर्शनकारीलाई नियन्त्रणमा लिएको जनाइएको छ । प्रहरीका अनुसार घटनाबारे विस्तृत अनुसन्धान सुरु गरिएको छ । सर्वोच्च अदालत जल्नु देशको न्याय प्रणालीमात्र होइन, राजनीतिक आन्दोलन पनि नयाँ मोडमा प्रवेश गरेको संकेत भएको कानुन विद्धहरूको भनाई छ।
