काठमाडौँ । साल्ट ट्रेडिङ कर्पोरेशन लिमिटेडले चालु आर्थिक वर्षको तेस्रो त्रैमाससम्म उल्लेखनीय नाफा वृद्धि गरेको छ। कम्पनीले यस अवधिमा ९ करोड ५७ लाख रुपैयाँ खुद नाफा कमाएको छ, जुन अघिल्लो वर्षको सोही अवधिको तुलनामा करिब ९४ प्रतिशतले बढी हो। गत वर्ष यही अवधिमा कम्पनीको नाफा ४ करोड ९२ लाख रुपैयाँ रहेको थियो।
यस अवधिमा कम्पनीको कुल बिक्री आम्दानी ६ अर्ब ६१ करोड रुपैयाँ पुगेको छ।
खर्चतर्फ हेर्दा कम्पनीले कर्मचारीतर्फ २७ करोड ९२ लाख रुपैयाँ खर्च गरेको छ भने ब्याज खर्च १८ करोड ६३ लाख रुपैयाँ रहेको छ। त्यस्तै, ह्रासकट्टी १ करोड ३ लाख रुपैयाँ र प्रशासनिक खर्च ९ करोड ६६ लाख रुपैयाँ पुगेको छ।
कम्पनीको जगेडा तथा मुनाफा कोष १ अर्ब ४० करोड रुपैयाँ पुगेको छ। वित्तीय अवस्थाअनुसार चालु सम्पत्ति ७ अर्ब ९४ करोड रुपैयाँ र चालु दायित्व ८ अर्ब ४९ करोड रुपैयाँ रहेको देखिन्छ।
समीक्षा अवधिसम्म कम्पनीको प्रतिसेयर आम्दानी (EPS) ३६.१९ रुपैयाँ कायम भएको छ भने प्रतिसेयर नेटवर्थ ३७५.७ रुपैयाँ पुगेको छ। प्रतिसेयर कुल सम्पत्तिको मूल्य २,९०६.३० रुपैयाँ र मूल्य–आम्दानी अनुपात (P/E) १८५.०४ गुणा रहेको छ।
