काठमाडौँ । चालु आर्थिक वर्षको तेस्रो त्रैमासको समयावधिमा प्रभु महालक्ष्मी लाइफ इन्सुरेन्सको खुद नाफामा ३८.७५ प्रतिशतले बढेर २६ करोड ८९ लाख २० हजार रुपैयाँ पुगेको छ।
कम्पनीले अघिल्लो वर्षको सोही समयावधिमा १९ करोड ३८ लाख २१ हजार रुपैयाँ खुद नाफा आर्जन गरेको थियो । खुद बिमा शुल्क आर्जन र लगानी तथा कर्जाबाट हुने आम्दानी बढेसँगै खुद नाफामा समेत वृद्धि भएको हो ।
खुद बिमा शुल्क आर्जन १०२.८४ प्रतिशतले बढेर २ अर्ब ९६ करोड ४० लाख १७ हजार रुपैयाँ पुगेको छ। अघिल्लो वर्ष यसै अवधिमा यसले १ अर्ब ४६ करोड १२ लाख ७६ हजार रुपैयाँ खुद बिमा शुल्क आर्जन गरेको थियो।
यता, लगानी तथा कर्जाबाट हुने आम्दानी १२४.७८ प्रतिशतले बढेर ८४ करोड १७ लाख २९ हजार रुपैयाँ पुगेको छ । चैत मसान्तसम्म आइपुग्दा प्रभु महालक्ष्मी लाइफ इन्सुरेन्सको चुक्ता पुँजी ४ अर्ब २९ करोड ६० लाख रुपैयाँ पुगेको छ ।
