काठमाडौँ । प्रतिनिधिसभा सदस्य बिजुला रायमाझीले वास्तविक कृषकलाई प्रोत्साहन हुनेगरी बजेट नआएको बताएकी छन् ।
बिहीबार प्रतिनिधिसभा बैठकको शून्य समयमा बोल्दै उनले आर्थिक वर्ष २०८०/८१ को बजेट वास्तविक कृषकलाई प्रोत्साहन हुनेगरी नआएको बताएकी हुन् ।
रायमाझीले कृषिप्रधान देश भनिएपनि वास्तविक कृषकलाई प्रोत्साहन हुने ठोस योजना बजेटमा नदेखिएको बताइन् ।
साथै उनले सरकारले कृषि क्षेत्रलाई प्राथमिकता दिनुपर्ने बताइन् ।
त्यस्तै सदस्य विद्या भट्टराईले पोखरामा वर्षा हुनासाथ जलमग्न हुने समस्या रहेको बताइन् । उनले वर्षा यामको पानीलाई व्यवस्थित ढल निकासको लागि सरकारको ध्यानाकर्षण गराइन् ।
प्रतिनिधिसभा सदस्य सोविता गौतमले देशमा जलवायु आपत्काल आउन लागेको भन्दै सरकारको ध्यानाकर्षण गराइन् । उनले अकल्पनीय कठिनाइ आउने निश्चित देखिएको बताइन् ।
त्यस्तै प्रतिनिधिसभा सदस्य विराजभक्त श्रेष्ठले नीतिगत भ्रष्टाचार गाउँ गाउँसम्म पुगेको बताए । उनले यसलाई समयमै प्रभावकारी ढंगले नियन्त्रण नगरे संघीयताको औचित्य नै समाप्त हुन सक्ने बताए ।
श्रेष्ठले अख्तियारले नीतिगत भ्रष्टाचारलाई अनुसन्धानको दायरामा नसमेटिनु मुलुकको लागि दुर्भाग्यपूर्ण भएको बताए ।
