काठमाडौं । सरकारले लामो दुरीको सार्वजनिक यातायातको भाडा घटाएको छ । हिजो डिजेल र पेट्रोलमा प्रतिलिटर १० रुपैयाँले मूल्य घटाए लगत्तै यातायात व्यवस्था विभागले नयाँ भाडादर सार्वजनिक गरेको हो ।
इन्धनको मूल्यमा पाँच प्रतिशत तलमाथि हुनासाथ गाडी भाडा समायोजन गरिन्छ । अन्तर प्रदेशको भाडा केन्द्र सरकारबाट र अन्तरपालिकाको भाडा भने प्रदेश सरकारबाट निर्धारण हुन्छ ।
यातायात विभागका अनुसार यात्रुबाहक सवारीसाधनमा ३.२० प्रतिशत भाडा घटेको छ । त्यस्तै पहाडी बाटोमा चल्ने मालबाहक गाडीमा ४.१९ प्रतिशत र तराईको बाटोमा सञ्चालन हुने मलबाहक गाडीमा ४.६५ प्रतिशतले भाडा घटाएको विभागले जनाएको छ ।
