काठमाडौँ। सहकारी ठगी मुद्दामा दोषी ठहर भएका नेकपा एमालेका नेता कृष्ण अर्याल पक्राउ परेका छन् । दिगो पर्यटन सहकारी संस्थामा ठगी गरेको आरोपमा एमाले नेता अर्याल पक्राउ परेका हुन् ।
सोह्रखुट्टेमा रहेको दिगो पर्यटन सहकारी संस्थाबाट लिएको ऋण तिर्न अस्वीकार गरेपछि काठमाडौँ जिल्ला अदालतको पक्राउ आदेशका आधारमा सोह्र खुट्टे प्रहरीले उनलाई पक्राउ गरी अपराध महाशाखामा बुझाएको हो ।
प्रहरीका अनुसार अब अर्याललाई आवश्यक कानुनी प्रक्रिया पूरा गरी कारागार चलान गरिनेछ।२०७४ साल जेठ ३० गते अर्यालले सहकारीबाट ११ लाख ५० हजार रुपैयाँ ऋण लिएका थिए ।
सहकारीले पटक पटक लिखित र मौखिक अनुरोध गर्दा पनि उनले साँवा र ब्याज तिर्न अस्वीकार गरेपछि २०७९ पुस ४ गते संस्थाले काठमाडौँ जिल्ला अदालतमा ठगीको मुद्दा दायर गरेको थियो ।
अर्याल एमालेको उपत्यका विशेष प्रदेश कमिटी सदस्य हुन् । उनले उद्योग व्यवसाय विशेष जिल्लाबाट प्रतिनिधित्व गर्दै आएका थिए । उनीमाथि काठमाडौँ जिल्ला अदालतले २०८२ जेठ ५ गते एक वर्ष कैद र ११ लाख ५० हजार रुपैयाँ बिगो तिर्नुपर्ने आदेश दिएको थियो ।
