काठमाडौँ । अमेरिकी स्वतन्त्रताको २५०औँ वार्षिकोत्सवको अवसरमा अमेरिकाले राष्ट्रपति डोनाल्ड ट्रम्पको तस्वीर अंकित एक डलरको सिक्का सार्वजनिक गरेको छ । अमेरिकी मिंटले विशेष अवसरको स्मरणमा उक्त सिक्का तयार गरेको हो ।
अमेरिकी मिंटका अनुसार यो सिक्का दैनिक कारोबारमा प्रयोग गर्न नभई संग्रहका लागि जारी गरिएको हो । स्वतन्त्रताको २५०औँ वार्षिकोत्सवलाई स्मरणीय बनाउने उद्देश्यले तयार गरिएको सिक्का बिक्रीमा राखिएको केही घण्टामै ‘आउट अफ स्टक’ भएको थियो ।
बिक्रीका लागि राखिएका प्रारम्भिक सिक्का सकिएपछि थप सिक्का उत्पादन भइरहेको अमेरिकी मिंटले जनाएको छ । मिंटका अनुसार २५ वटा सिक्काको एउटा रोलको मूल्य ६१ अमेरिकी डलर तोकिएको छ भने १०० वटा सिक्काको एउटा ब्यागको मूल्य १५४.५९ अमेरिकी डलर रहेको छ ।
सुनौलो रंगमा तयार गरिएको उक्त सिक्कामा वास्तविक सुन भने प्रयोग गरिएको छैन । सिक्कामा ट्रम्पको तस्वीरसँगै अमेरिकी स्वतन्त्रताको २५०औँ वार्षिकोत्सवसँग सम्बन्धित डिजाइन समावेश गरिएको छ ।
