काठमाडौं । कर्मचारी सञ्चय कोषले सञ्चय कोष तथा निवृत्तभरण कोष रकममा प्रदान गर्ने र सञ्चयकर्ता सापटीमा लिने ब्याजदरमा परिवर्तन गरेको छ । कोषले २०८१ साल साउन १ गते देखि लागू हुने गरी व्याजदरमा परिवर्तन गरेको हो ।
सञ्चय कोष रकम र निवृत्तभरण कोष रकममा दिने ब्याजदर पाँच दशमलव पाँच शुन्य प्रतिशत र विशेष सापटीको ब्याजदर छ दशमलव छ शुन्य प्रतिशत कायम भएको छ । यस्तै, धितोमा आधारित घर सापटी, शैक्षिक सापटी र घर मर्मत सापटीको ब्याजदर घटाई सात दशमलव पाँच शुन्यप्रतिशत कायम गरेको छ भने जग्गा खरिद सापटी र सरल सापटीमा आठ प्रतिशत व्याज रकम लिने निर्णय गरेको छ।
कोषले विशेष सापटी बाहेकका धितोमा आधारित सापटीको व्याज नियमित रुपमा चुक्ता गर्ने सञ्चयकर्ताको हकमा शून्य दशमलव दुई पाँच प्रतिशत विन्दुले छुट दिने निर्णय समेत गरेको छ । कोषले आर्थिक वर्ष २०८०/८१ को सञ्चयकर्ता र योगदानकर्ताको व्यक्तिगत खाता २०८१ साल आषाढ मसान्तमा तयार हुने र यसरी व्यक्तिगत खाता तयार गर्ने कार्य आषाढ मसान्तको कार्यालय समय पछि शुरु हुने भएकोले २०८१ साल श्रावण १ गते सञ्चयकर्तालाई प्रवाह गरीने सेवा बन्द हुने समेत जनाएको छ।
कोषले काठमाण्डौ उपत्यका तथा सातै प्रदेशमा रहेका शाखा कार्यालय र सेवा केन्द्रमार्फत सञ्चयकर्तालाई सहुलियत दरमा विशेष सापटी, घर सापटी¸ शैक्षिक सापटी¸ सरल सापटी¸ घर मर्मत सापटी र जग्गा खरिद सापटी प्रदान गरिरहेको छ । कोषले सञ्चयकर्ताको खातामा जम्मा भएको रकमको सुरक्षणमा नब्बे प्रतिशतसम्म रकम विशेष सापटीको रुपमा प्रदान गर्दै आइरहेको छ भने घर निर्माण गर्न र घर तथा जग्गा खरिदको लागि एक करोडसम्मको सापटी रकम प्रदान गर्ने गरेको छ ।
सञ्चयकर्ता स्वंय वा पतिरपत्नी वा छोरारछोरीलाइ उच्च शिक्षा अध्ययन गराउने प्रयोजनको लागि चालिस लाख सम्म रुपैयाँ सम्म प्रदान गर्ने गरेको छ भने सरल सापटी स्वरुप चालिस लाख सम्म र घर मर्मत गर्न तीस लाख रुपैयाँ सम्म प्रदान गर्ने गर्दछ । हाल कोषमा निजामती¸ नेपाली सेना, नेपाल प्रहरी र सशस्त्र प्रहरी, सार्वजनिक संस्थान र संगठित क्षेत्र एवं सामुदायिक तथा संस्थागत विद्यालयतर्फका गरी ६ लाख ४५ हजार सञ्चयकर्ता तथा योगदानकर्ताहरु आवद्ध रहेका छन् ।
